विरगन्ज । छपकैयाकी २० वर्षकी युवती विष्णु लामालाई साउन २१ गतेदेखी ज्वरो आईरहेको थियो । औषधी खाएपछि ज्वरो निको भयो तर, शुक्रबार साँझ एक्कासी श्वासप्रश्वास सम्वन्धि समस्या देखियो । श्वासप्रश्वासमा समस्या देखिएको र ज्वरो समेत आएपछि परिवारका सदस्यले उनलाई विरगन्जको एडभान्स अस्पताल लगे । यो समाचार आजको सौर्य दैनिकमा प्रकाशित छ।
अस्पतालको ढोकामा पु¥याएपछि उनको लक्षण कोरोनासँग मिल्दोजुल्दो देखियो । त्यसपछि अस्पतालले आईसीयू खाली नभएको भन्दै अर्को अस्पताल लैजान भन्यो । ईरिक्सामा रहेकी बिरामीलाई लिएर उनका परिवार गण्डकस्थित बयोधा अस्पताल पुगे । बयोधा अस्पतालका डाक्टरहरुले ‘कोरोनाको लक्षण देखिएका बिरामीको यहाँ चेकजाँच हुन नसक्ने’ भनेर फर्काएको लामाका भिनाजु रुपेश सिंहले बताए । कोरोना संक्रमणसँग मिल्दोजुल्दो लक्षण देखिएमा एम्बुलेन्स समेत नपाएपछि उनलाई ईरिक्सामा लगिएको सिंहले जानकारी दिए ।
बयोधा अस्पतालबाट विरामी लामालाई तराई अस्पतालमा पु¥याइयो । त्यहा पुग्दासम्म उनको अवस्था निक्कै गम्भिर बन्दै गईरहेको थियो । तराई अस्पतालबाट आइसियू नभएको भन्दै गेटबाट फर्काए । त्यसपछि भवानी मेडिकल, वीरगन्ज हेल्थ केयर लगेपनि त्यहापनि विरामीको उपचार गर्न मानेनन् । आफन्तका अनुसार अधिकाशं अस्पतालले पिसिआर रिपोर्ट माग गरेका थिए । रिपोर्ट भएमात्र उपचार गर्ने नभए नगर्ने बताएका थिए ।
धेरै भनसुनपछि अन्तत उनलाई रातको समयमा गण्डक कोभिड अस्पतालमा भर्ना गरियो । विरामीको अधिकाशं समय अस्पतालको ढोका ढोकामा घुम्दैमा वित्यो । त्यस बेलासम्म उनको अवस्था निक्कै जटिल बनेको थियो । एक बच्चाकी आमा समेत रहेकी लामाले राति २ बजेर १२ मिनेटमा संसार त्यागिन् ।
कोभिड विशेष अस्पताल गण्डकका कोअर्डिनेटर डा. उदयनारायण सिंहले समयमा उपचार हुन नपाएका कारण उनको मृ-त्यु भएको बताए । ‘चार–पाँच दिनदेखि ज्वरो, रुघाखोकीले सिकिस्त बनेकी ती महिलालाई उपचारको लागि समयमा अस्पताल नल्याइएको र सिकिस्त भएपछि उपचारको लागि एउटा अस्पतालदेखि अर्को अस्पताल लैजाँदा लैजाँदै समयमा उपचार हुन नपाई मृ-त्यु भएको हो’, डा. सिंहले भने । मृतक युवतीका श्रीमान विदेशमा छन् । उनी चार वर्षे बच्चासहित छपकैयामा डेरा लिएर बस्दै आएकी थिइन् । गण्डक अस्पतालले कोरोना भाइरस परीक्षणका लागि मृतक लामाको स्वाब संकलन गरी नारायणी अस्पतालको प्रयोशालामा पठाइएको छ ।
अस्पतालहरूले मानवता नै बिर्सिएर सिकिस्त बिरामीहरूको उपचार नै गर्न छाडेकाले पछिल्ला केही दिनयता तीन जनाको मृ-त्यु भईसकेको छ । जिल्ला प्रशासन कार्यालय पर्साले केही दिनअघि मात्र बिरामीलाई भर्ना नलिने अस्पताललाई कारबाही गर्ने निर्णय गरेको थियो । अस्पतालले आइसोलेसन वार्ड बनाउने र कोभिड रिपोर्टका संक्रमित भएकालाई मात्र कोभिड अस्पतालमा रेफर गर्ने र अन्यलाई उपचार गर्ने निर्देशन जारी गरेको थियो । निर्देशन जारी गरेको तीन दिनमा तीन जनाको उपचार नपाएर मृ-त्यु भइसकेको छ ।
