काठमाडौँ – आइतबार नेपालमा ३ सय जना भन्दा बढीमा कोरोना भाइरस संक्रमणको पुष्टि भएको छ। देशभर रहेका विभिन्न प्रयोगशालामा गरिएको परीक्षणबाट आइतबार ३ सय ८० जनामा कोरोनाको पुष्टि भएको हो।
स्वास्थ्य तथा जनसंख्या मन्त्रालयको नियमित पत्रकार सम्मेलनका क्रममा मन्त्रालयका प्रवक्ता डाक्टर जागेश्वर गौतमले नेपालमा ३ सय ८० जना कोरोना भाइरस संक्रमित थपिएको जानकारी गराए। आइतबारको थप पुष्टिसँगै नेपालमा कोरोना भाइरस संक्रमितको संख्या २२ हजार ९ सय ७२ पुगेको छ ।
मन्त्रालयका प्रवक्ता डा. जागेश्वर गौतमका अनुसार अहिले ६ हजार ५ सय ४४ जनामा सक्रिय सङ्क्रमण छ भने १६ हजार ३ सय ५३ जना भाइरसमुक्त भएका छन्। जस मध्ये ४० जना कोरोना भाइरस संक्रमित बितेको २४ घण्टामा निको भएका हुन्।
विगत २४ घण्टामा ८,५१५ जनाबाट सङ्कलित नमुनाको पीसीआर विधिबाट परीक्षण गरिएको मन्त्रालयले जनाएको छ। अहिले देशभरि क्वारन्टीनमा ११,०३८ जना छन्।
