काठमाडौँ – बिसं २०७६ सालको एसईईको नतिजा प्रकाशित भएको छ । राष्ट्रिय परीक्षा बोर्डले बिसं २०७६ सालको एसईईको नतिजा भर्खरै प्रकाशित गरेको हो।
सोमबार बसेको बोर्ड सदस्य सहितको बैठकले परिक्षाफललाई अनुमोदन गरेसँगै एसईईको नतिजा प्रकाशित भएको बताइएको छ। बैठक जारी रहेको र उक्त बैठकले परिक्षाफल सार्वजनिक गर्ने निर्णय गरेको बोर्डका एक सदस्यले जनाएका छन्। नतिजा प्रकाशित गर्ने निर्णय भइसकेको भएता पनि एसएमएस र इन्टरनेटमा नतिजा उपलब्ध हुन भने समय लाग्नेछ।
बोर्डले परीक्षाफल प्रकाशित गर्नुअघि सहमतिका लागि सीसीएमसीमार्फत मन्त्रिपरिषद्मा प्रस्ताव पठाएको थियो । मन्त्रिपरिषद्को बैठकले सावधानी अपनाएर परीक्षाफल प्रकाशित गर्न सहमति दिएपछि परीक्षाफल प्रकाशन गरिएको बोर्डले जनाएको छ।
चैत ६ गतेबाट सुरू हुने तय भएको माध्यमिक शिक्षा (एसईई) परीक्षा कोरोना महामारीका कारण सरकारले स्थगित गरेको थियो। महामारीका कारण परीक्षा हुन नसक्ने देखिएपछि सरकारले विद्यालयले नै मुल्यांकन गर्ने निर्णय गरेसँगै विद्यालयहरुले आफ्ना विद्यार्थीहरुको अन्तरिक मुल्यांकन गरी विवरण बोर्डमा पेश गरेका थिए।
