काठमाडौं – राष्ट्रिय परीक्षा बोर्डले होम सेन्टर कायम गरी परीक्षा गर्ने तयारी गरेको छ । पाँच महिनादेखि स्थगित कक्षा १२ को परीक्षा सञ्चालन गर्न होम सेन्टरलाई पहिलो प्राथमिकतामा राखिएको छ । यो समाचार आजको नेपाल समाचारपत्रमा प्रकाशित छ।
बोर्डले सबै सरोकारवालासँग छलफल गरी होम सेन्टर कायम गरी परीक्षा गर्ने तयारी गरेको हो । तीन सातादेखि छलफल गरी बोर्डले यो साता शिक्षा, विज्ञान तथा प्रविधिमन्त्री गिरिराजमणि पोखरेललाई प्रतिवेदन बुझाउने तयारी गरेको छ ।
बोर्डले विज्ञ, बोर्डका सदस्य, शिक्षक महासंघ, संघ, विद्यार्थी संघसंगठन, प्याब्सन, हिसान, प्रधानाध्यापक केही विद्यालयका सञ्चालकसँग भर्चुअल छलफल गरेको थियो । छलफलका आधारमा बोर्डले प्रतिवेदन लेखन शुरु गरेको छ ।
प्रतिवेदनमा यसअघि परीक्षा केन्द्र खारेज गरी विद्यालयमै परीक्षा लिन सक्ने गरी होम सेन्टर तय गर्न तयारी गरेको छ । बोर्डका अध्यक्ष प्राडा चन्द्रमणि पौडेलले कोरोना संक्रमण कम भएको खण्डमा होम सेन्टर कायम गरी परीक्षा गर्ने तयारी भइरहेको बताउनुभयो । बोर्डले यो माध्यमको परीक्षा दुई चरणमा गर्ने गरी सिफारिस गर्ने जनाइएको छ ।
कोरोना कम भएको जिल्लामा पहिलो र बढी भएको जिल्लामा अनुकूल हेरी मंसिरभित्रै परीक्षा सक्ने तयारी गरेको छ । यही अवस्था रहे दशैंअघि परीक्षा गर्न नसक्ने बोर्डको धारणा छ ।
‘तर, कोरोना संक्रमणको दर घट्द गए दशैंअघि पहिलो र दशैंपछि दोस्रो चरणको परीक्षा सक्ने तयारी गरेका छौं।’ –अध्यक्ष प्राडा पौडेलले भन्नुभयो । छलफलका क्रममा रहेका अधिकांशले दशैंअघि परीक्षा लिन सम्भव नहुने विचार राखेका थिए ।
बोर्डले अनलाइनबाट परीक्षा गर्न असम्भव हुने निक्र्याेल निकालेको छ । छलफलपछि बोर्डले विभिन्न मोडल तयार गरी सोहीअनुसार परीक्षा गर्न सिफारिस गर्नेछ ।
बोर्डले अघि सारेको मोडालिटीमा तयारी भइरहेको प्रश्नपत्र प्रदेश परीक्षा कार्यालयमा मार्फत होम सेन्टरमा परीक्षा सञ्चालन गर्ने, कोरोना महामारी कम भएको जिल्ला र क्षेत्रमा परीक्षा सञ्चालन गर्दै जाने रहेको छ ।
कक्षा ११ को परीक्षाको मूल्याङ्कनको आधार लिएर केही प्रतिशत अंक ११ र केही प्रतिशत १२ कक्षाको पढाइलाई आधार मानेर बोर्डले अंक दिने मोडल उल्लेख छ । सो अनुसार प्रयोगात्मक विषयको परीक्षा लिने अधिकार विद्यालयलाई दिने तयारी गरेको छ ।
सो विधिअनुसार १२ को प्रयोगात्मक परीक्षा अनलाइनबाट प्रश्न तयार गरी भर्चुअल माध्यमबाट सोध्ने विकल्प अघि बढाएको छ ।
छलफलको क्रममा अधिकांशले कक्षा १० को जस्तै गरी विद्यालयलाई अधिकार दिनुपर्ने बताएका थिए । बोर्डले कक्षा १२ को माध्यमिक तहको अन्तिम परीक्षा भएकाले लब्धाङ्कपत्र उपलब्ध गराएर मात्र परीक्षा सक्ने प्रवृृत्ति कायम हुन नदिने अडानमा छ ।
