काठमाडौँ – जनकपुरमा एक महिलाले एकै पटकमा ४ वटा बच्चा जन्माएकी छन्। धनुषाको विदेह नगरपालिका–७ जोगियारा बस्ने २२ वर्षीया अरमाना खातुनले मंगलबार एकैपटक ४ सन्तान जन्माएकी हुन्।
अरमाना प्रसूतिका लागि मंगलबार बिहान जनकपुरधामस्थित काव्या अस्पतालमा भर्ना भएको र स्त्री तथा प्रसुती रोग विशेषज्ञ चिकित्सक सोनिया सिंहले शल्यक्रिया मार्फत चार सन्तान निकालेको बताएको छ।
जन्मिएका सन्तानहरुमा ३ छोरी र १ छोरा रहेका छन्। अस्पतालले दिएको जानकारी अनुसार छोराको तौल डेढ किलो र छोरीहरुको तौल सवा एक किलो रहेको छ।
शिशुहरु मध्ये ३ वटाको स्वास्थ्य अवस्था समान्य रहेपनि एक शिशुको अवस्था भने अस्थिर देखिएको अस्पतालको भनाई छ। श्वासप्रश्वासमा समस्यामा देखिने हुँदा शिशुहरुलाई निरन्तर निगरानीमा राखिएको छ।
४ सन्तान जन्माएकी अरमानाको अवस्था गम्भीर रहेको अस्पतालले जनाएको छ। उनको फोक्सोमा पानी जमेर पलमनरी एडीमा देखिएका कारण उनलाई भेन्टिलेटरमा राखिएको छ।
उनको स्वाब संकलन गरेर प्रादेशिक प्रयोगशाला जनकपुरमा पठाइसकिएको छ।
