भद्रपुर – कोरोना भाइरस सङ्क्रमणलाई ध्यानमा राखी नेपाल–भारत सीमानाका बन्द भएको पाँच महिना बितिसकेको छ । झापाको १ सय ४४ किलोमिटर खुला सीमानामा रहेका नाकामध्ये मुख्य भारतको पश्चिम बङ्गालसँग सीमाना जोडिएको काँकडभिट्टा र विहार तथा बङ्गालसँग जोडिएको भद्रपुर दोस्रो नाका पर्छन् । यी नाकाबाट आयात–निर्यातको चाप बढी मात्रामा हुँदै आइरहेकोमा पछिल्लो समय यो चाप ह्वात्तै घटेको छ । यो समाचार आजको नेपाल समाचारपत्रमा प्रकाशित छ।
कोरोना सङ्क्रमण उच्च देखिन थालेपछि नेपाल सरकारले देशभरिका नाकामध्ये १० वटालाई अनुमति दिएको थियो, जसमा झापाको काँकडभिट्टा पनि हो । भद्रपुर नाकाबाट मालसामान खुला गरे पनि मानिस आवत–जावतका लागि काँकडभिट्टालाई मात्र अनुमति दिइएको थियो । सो नाकामा भारतको पानीटङ्कीतर्फ कडाइ गरे पनि भारतको तुलनामा नेपालतर्फ खासै देखिएको थिएन । नेपाली नागरिक भारतबाट नागरिकता या मतदाता परिचयपत्रको माध्यमबाट सजिलै आउने गरेका छन् भने नेपालबाट भारत जानआधार कार्ड र मतदाता परिचयपत्र अनिवार्य गरेको छ ।
नेपालले छाडे पनि भारतीय प्रहरीले चेकपोस्टबाट नै फिर्ता पठाउँदै आएको छ । सीमामा खटिएका प्रहरीले सुरक्षा मापदण्ड अपनाएको भने देखिएन ।
नेपालमा रहेकी साथीको मृत्यु भएपछि केही महिनाअघि भारतको सिलगुडीबाट आएकी लक्ष्मी हिङमाङलाई नेपालतर्फका सुरक्षाकर्मीले छाडे पनि भारतीय प्रहरीले फिर्ता पठाएको थियो । कागज नपुगेका कारण भारतीय प्रहरीले जान नदिएको मेचीपुलमा उहाँले बताउनुभयो ।
नाकाबाट दैनिक २ सयसम्म मानिस आवत–जावत गर्ने गरेको इलाका प्रहरी कार्यालय काँकडभिट्टाका डीएसपी राजेन्द्र पोखरेल बताउनुहुन्छ । नाकामा कडाइ गरिएको उहाँको भनाइ छ । आएका मानिसलाई प्रहरीको निगरानीमा होल्डिङ सेन्टरमा लगिने र सम्बन्धित स्थानीय निकायको सिफारिसका आधारमा पठाइने उहाँको भनाइ छ । भारतबाट आएका मालवाहक सवारीसाधनलाई भन्सार राखेर चेकजाँचपछि मात्र पठाउने गरेको उहाँको भनाइ छ ।
