काठमाडौँ – नेपाल विद्युत प्राधिकरणका कार्यकारी निर्देशकको रुपमा चार वर्षे कार्यकाल सकाएर बिदा भएका कुलमान घिसिङले एउटै व्यक्ति एउटा जिम्मेवारीमा सधै रहिरहनुपर्छ भन्ने नरहेको बताएका छन्।
मंगलबार प्राधिकरणमा आयोजित बिदाइ कार्यक्रमलाई सम्बोधन गर्दै घिसिङले एउटै व्यक्ति एउटा जिम्मेवारीमा सधै रहिरहनुपर्छ भन्ने नरहेको बताएका हुन्।
उनलाई नै पुनः कार्यकारी निर्देशकको रुपमा नियुक्त गरिनुपर्छ भन्ने माग सर्वत्र उठिरहेका बेला घिसिङको तर्फबाट यस्तो भनाई आएको हो। बिदाइ कार्यक्रमलाई सम्बोधन गर्ने क्रममा उनले केही पनि विकल्परहित नरहेकोसमेत प्रष्ट पारे।
“हिजो विद्युत प्राधिकरणमा को आयो को गयो कसैलाई थाहा हुँदैन थियो। अहिले कार्यकारी निर्देशकको पोष्टको चर्चा आएपछि प्राधिकरणको इज्जत बढेको ठान्नु पर्छ। यो विषय हाम्रो लागि राम्रो हो। कार्यकारी निर्देशक आउने जाने हुन्छ। एउटा व्यक्ति सधै रहिरहनुपर्छ भन्नेमा म छैन। विकल्परहित केही हुँदैन।”,उनले भने।
नेपाल विद्युत प्राधिकरणका कार्यकारी निर्देशक कुलमान घिसिङको औपचारिक रुपमै बिदा भएका छन्। आइतबार चार वर्षे कार्यकाल सकिएका घिसिङको मंगलबार औपचारिक रुपमा बिदाइ गरिएको हो। मंगलबार प्रधिकरणमा आयोजित कार्यक्रममा प्राधिकरणका कर्मचारीहरुले घिसिङको चार वर्षे कार्यकाल सकिएपछि बिदाइ गरे।
प्राधिकरणका उपकार्यकारी निर्देशक हितेन्द्रदेव शाक्यले घिसिङलाई बुद्धको मूर्ति उपहारस्वरुप दिए भने बिदाई गर्नेक्रममा घिसिङले आफ्नो कार्यकालमा उत्कृष्ट कार्य गर्न सकेको प्रति धन्यवाद तथा बधाई दिए।
आधिकारिक ट्रेड युनियन नेपाल विद्युत प्राधिकरण कर्मचारी युनियनका अध्यक्ष रामेश्वोर पौडेलले माफियाको चङ्गुल नफसी काम गरी प्राधिकरणलाई घिसिङले नाफा तर्फ अगाडी बढाएको बताए।
साथै उनले पहिलो कार्यकालका रुपमा मात्रै बिदा गरिएको बताए। आउने केहि हप्ता मै पुनः स्वागत गर्ने पाइने विश्वास व्यक्त गरे। सरकारले घिसिङलाई दोस्रो कार्यकाल पनि काम गर्न दिने उनको विश्वास थियो।
