काठमाडौँ – पछिल्लो २४ घण्टामा नेपालमा १ हजार भन्दा बढीमा कोरोना सङ्क्रमण पुष्टि भएको छ । देशभर रहेका विभिन्न प्रयोगशालामा गरिएको परीक्षणबाट आज १ हजार भन्दा बढीमा कोरोना भाइरस संक्रमणको पुष्टि भएको हो।
स्वास्थ्य तथा जनसंख्या मन्त्रालयको नियमित प्रेस ब्रिफिङमा क्रममा प्रवक्ता डा. जागेश्वर गौतमले देश भर १ हजार ५ सय ३९ जनामा कोरोना भाइरस संक्रमणको पुष्टि भएको जानकारी दिए। योसँगै नेपालमा कोरोना भाइरसबाट सङ्क्रमितको सङ्ख्या ५८ हजार नाघेको छ । आजसम्म ५८ हजार ३ सय २७ जनामा संक्रमण पुष्टि भएको छ ।
गएको २४ घण्टामा १० हजार चार सय ९४ जनाकाे पीसीआर परीक्षण गरिएको हो।
बुधबारको पुष्टि अहिले सम्मकै उच्च हो। यस भन्दा अगाडी हिजो मंगलबार अहिले सम्मकै बढी १ हजार ४ सय ५९ जनामा कोरोना भाइरस संक्रमणको पुष्टि भएको थियो।
पछिल्लो २४ घण्टामा १ हजार ६८ जना कोरोनाबाट निको भएका छन्। जससँगै नेपालमा कोरोना भाइरस संक्रमण मुक्त हुनेको संख्या ४१ हजार ७ सय ६ पुगेको छ। अब नेपालमा १६ हजार २ सय ४२ जना सक्रिय सङ्क्रमित रहेका छन्। यस्तै ७ हजार ८ सय २० जना क्वारेन्टिनमा छन्।
यस्तै गएको २४ घण्टामा ८ जनाको ज्यान गएसँगै कोरोना सङ्क्रमणबाट ज्यान गुमाउनेको सङ्ख्या ३ सय ७९ पुगेको छ।
