काठमाडौँ – पछिल्लो २४ घण्टामा नेपालमा १ हजार भन्दा बढीमा कोरोना सङ्क्रमण पुष्टि भएको छ । देशभर रहेका विभिन्न प्रयोगशालामा गरिएको परीक्षणबाट आज १ हजार भन्दा बढीमा कोरोना भाइरस संक्रमणको पुष्टि भएको हो।
स्वास्थ्य तथा जनसंख्या मन्त्रालयको नियमित प्रेस ब्रिफिङमा क्रममा प्रवक्ता डा. जागेश्वर गौतमले देश भर १ हजार ३ सय २५ जनामा कोरोना भाइरस संक्रमणको पुष्टि भएको जानकारी दिए। योसँगै नेपालमा कोरोना भाइरसबाट सङ्क्रमितको सङ्ख्या ६२ हजार नाघेको छ । आजसम्म ६२ हजार १ सय २२ जनामा संक्रमण पुष्टि भएको छ ।
पछिल्लो २४ घण्टामा ९ हजार ५८४ जनाको पिसिआर परीक्षण भएको छ। योसंगै, हालसम्म ९ लाख १४ हजारको पिसिआर परीक्षण भएको छ।
पछिल्लो २४ घण्टामा ९६६ जना कोरोनाबाट निको भएका छन्। जससँगै नेपालमा कोरोना भाइरस संक्रमण मुक्त हुनेको संख्या ४६ हजार २ सय ३३ पुगेको छ। अब नेपालमा १७ हजार ४ सय ७८ जना सक्रिय सङ्क्रमित रहेका छन्। यस्तै ९ हजार ७१ जना क्वारेन्टिनमा छन्।
यस्तै गएको २४ घण्टामा १० जनाको ज्यान गएसँगै कोरोना सङ्क्रमणबाट ज्यान गुमाउनेको सङ्ख्या ४ सय ११ पुगेको छ।
