एजेन्सी – प्रिमियर लिग क्लब आर्सनल लेजेण्ड रोबर्ट पाइरेसले रियल म्याड्रिड गएको खण्डमा किलियन एम्बाप्पेको भविष्य उज्जवल हुने बताएका छन्।
एक मिडियासँग कुराकानी गर्नेक्रममा पाइरेसले रियल म्याड्रिड गएको खण्डमा किलियन एम्बाप्पेको भविष्य उज्जवल हुने बताएका हुन्। पाइरेसका अनुसार आफ्नो क्यारियरलाई अझ उच्च तहमा पुर्याउन एम्बाप्पे रियल म्याड्रिड जानुपर्ने हुन्छ।
“अवश्य। म फ्रेन्च हुँ, म पेरिस सेन्ट-जर्मेन मन पराउँछु र म उनी फ्रेन्च लिग १ मा रहुन् भन्ने चाहन्छु।”,उनले भने,”तर खेलाडीको रुपमा थप उत्कृष्ट हुनको लागि उनी रियल म्याड्रिड जानुपर्ने हुन्छ।”
रियल गएको खण्डमा एम्बाप्पेले आफूलाई थप निखार्ने तथा बलियो बनाउने मौका पाउने उनको बुझाई छ। एम्बाप्पेसँग भएको प्रतिभा रियल पुगेपछि थप निखारिने उनी बताउँछन्।
पछिल्लो केहि समय देखि किलियन एम्बाप्पे पेरिस सेन्ट जर्मेन (पीएसजी) छाडेर कहाँ जाने हुन् भन्ने कुरा चर्चाको विषय बनिरहेको छ। एम्बाप्पेको भविष्यलाई लिएर फुटबलका जानकारहरुले आफ्नो आफ्नो तर्फ अगाडी सारिरहेका छन्।
एम्बाप्पे माथि रियल म्याड्रिड, बार्सिलोना, म्यानचेस्टर सिटी, म्यानचेस्टर युनाइटेड र लिभरपुल जस्ता क्लबहरुको नजर छ। यी क्लबहरुले एम्बाप्पेलाई आफ्नोमा ल्याउन सक्दो प्रयास गरिरहेको बताइन्छ।
सन् २०२२ सम्म पिएसजीसँग अनुबन्धित एम्बाप्पेले यो सिजनको अन्त्यमा क्लब छोड्न चाहेको विभिन्न अन्तराष्ट्रिय संचार माध्यमहरुको दावी छ। दुई वर्षपछि फ्री एजेन्टका रूपमा अन्य क्लबमा अनुबन्ध हुन सक्ने हुँदा अर्को सिजनमा पिएसजी एम्बाप्पेलाई बेच्ने सम्भावना उच्च रहेको बताइन्छ।
