एजेन्सी – ब्राजिलियन स्टार नेयमार पुन: बार्सिलोनामा आबद्ध सम्भावना लगभग टुंगिएको छ । ब्राजिलियन स्टारले पेरिस सेन्ट जर्मेन (पिएसजी) सँगको सम्झौता नविकरण गर्न चाहेको प्रष्ट पारेपछि बार्सिलोना फर्कने सम्भावना लगभग अन्त्य भएको हो ।
बार्सिलोनाको अहलिेको आर्थिक अवस्थाका कारण आफ्नो पुनरागमन क्याम्प नोउमा सम्भव नभएको नेयमारले बुझिसकेका छन् । सन् २०१७ मा विश्व कीर्तिमानी रकममा नेयमार बार्सिलोनाबाट पिएसजी पुगेका थिए । उनलाई बार्सिलोना फर्काउनको प्रयास नभएको पनि होइन । तर, सफल भएन ।
अहिले कारोना भाइरसको महामारीका कारण विश्व फुटबलका सफल र चर्चित क्लबलाई पनि आर्थिक रुपमा समस्या परिरहेको बताइन्छ । बीचमा केहि समयमा क्लबसँगका असन्तुष्ट रहेको नेयमार अहिले पिएसजीमा खुसी रहेको बताइन्छ । उनले क्लबका खेलकुद निर्देशक लियोनार्दोलाई आफुले सम्झौता नविकरण गर्न चाहेको जानकारी गराइसकेको बुझिएको छ ।
तर, पिएसजीले भने नेयमारलाई सम्झौता नविकरणका लागि उच्च प्राथमिकतामा राखेको छैन । पिएसजी अहिले केलियन एमबाप्पेको नविकरणमा केन्द्रित रहेको बताइन्छ । फ्रान्सेली युवा फरवार्डको सम्झौता २०२२ सम्म रहेको छ । रियल म्याड्रिडसँगै लिभरपुल, युभेन्ट्स र बार्सिलोनाले समेत एमबाप्पमाथि चासो राखेकाले पिएसजी उनलाई गुमाउने पक्षमा छैन ।
यो विषयमा नेयमार भने चिन्तित छैनन् । पिएसजीको व्यवस्थापनलाई नेयमारले पारिश्रमिक कटौतीका विषयमा पनि कुनै सल्लाह गरेका छैनन् । न त उनले बार्षिक ३० मिलियन युरो छाड्ने संकेत गरेका छन् ।
एमबाप्पलेको जस्तै नेयमारको सम्झौता पनि २०२२ को जुनमा समाप्त हुँदैछ । यदि सम्झौता नविकरण भएन भने उनी पनि २०२२ जनवरीबाट नयाँ क्लबसँग कुराकानी अघि बढाउन स्वतन्त्र हुनेछन् । तर पिएसजीले सम्भवत त्यस्तो चाहनेछैन ।
पिएसजीको परियोजनाका नेयमार मुख्य खेलाडी हुन् । अहिले भने उनी चोटका कारण केहि समयका लागि मैदान बाहिर छन् । लिग वन र च्याम्पियन्स लिगका केहि खेल उनले गुमाउनेछन् । पिएसजीका लागि ९१ खेल खेलिसकेका नेयमारले ७२ गोल गर्नुका साथै ४५ एसिस्ट गरेका छन् ।
