काठमाडौँ – बिहिबार बिहानै काठमाडौँमा भएको एक दुर्घटनामा परी ३ जनाको ज्यान गएको छ। काठमाडौंको कलंकीमा रोकिराखेको ट्रकलाई अर्को ट्रकले ठक्कर दिँदा तीन जनाको ज्यान गएको हो।
मकालु पेट्रोल पम्प छेउमा पार्किङ गरेर राखेको बा ३ ख ७५३० नम्बरको ट्रकलाई बा ५ ख ८८६५ नम्बरको ट्रकले ठक्कर दिँदा दुर्घटना भएको प्रहरीले जनाएको छ।
प्रहरीका अनुसार ठक्कर दिने ट्रकमा रहेका तीन जनाको ज्यान गएको हो। ज्यान गुमाउनेहरुमा नुवाकोट सुन्दरदेवी गाँउपालिकाका २४ वर्षीय रोशन तामाङ, नुवाकोटकै तारकेश्वरका ३७ वर्षीय माधव घिमिरे रहेका छन्। अर्का एक जनाको भने नाम खुल्न सकेको छैन।
यस्तै सोहि दुर्घटनामा परी अर्का एक घाइते भएका छन्। घाइते हुनेमा नुवाकोटकै विजय तामाङ रहेको र उनको अवस्था गम्भीर रहेको महानगरीय प्रहरी वृत्त कालीमाटीका डीएसपी अपिलराज बोहराले बताए।
प्रहरीले दुवै ट्रक तथा चालकलाई नियन्त्रणमा लिएर अनुसन्धान शुरु गरेको छ। तीव्र गति दुर्घटनाको कारण हुन सक्ने प्रहरीको अनुमान छ।
