एजेन्सी – स्पेनिस क्लब रियल म्याड्रिडका कप्तान सर्जियो रामोसलाई फ्रान्सेली क्लब पेरिस सेन्ट जर्मेन (पिएसजी) बोलाउन ब्राजिलियन स्टार नेयमारले फोन सम्पर्क गरेको खुलासा भएको छ ।
स्पेनिस संचारमाध्यम एएसका अनुसार पिएसजीले रामोसलाई ३ वर्षको सम्झौता दिने प्रस्ताव अघि सारेको छ । फ्रान्सेली क्लबले रामोसलाई वार्षिक २० मिलियन युरो प्रस्ताव गर्ने तयारी गरेको छ । रामोसको रियलसँगको सम्झौता यस सिजनपछि सकिनेछ । रामोसले चाहेको खण्डमा जनवरीमै अन्य क्लबसँग सम्झौताबारे छलफल गर्न पाउनेछन् ।
रियलले क्लबको विधिअनुसार ३० वर्ष काटेका खेलाडीलाई हरेक वर्ष एक सिजन नविकरण गर्दै आएको छ । तर रामोसले भने कम्तिमा तीन वर्ष सम्झौता हुनुपर्ने अडान राखेका छन् । रियलमा सहमति हुन नसके उनलाई पेरिस ल्याउन पिएसजी तत्पर छ । यसैक्रममा नेयमारले पनि रामोसलाई पिएसजी आउन आग्रह गर्दै सम्पर्क गरेका हुन् ।
ब्राजिलियन पत्रिका एल चिरिन्गुइतोको अनुसार नेयमारले पिएसजीमा सम्झौता नविकरण गर्न रामोसको आगमन निर्णायक हुने बताएका छन् । रामोस पिएसजी आउन सहमत भए आफूसँगै युवा फरवार्ड किलीयन एम्बाप्पेले पनि क्लबसँग नयाँ सम्झौता गर्ने उनले बताएका छन् ।
नेयमार र एम्बाप्पे दुवैको सम्झौता सन् २०२२ मा समाप्त हुँदैछ । तर फ्रान्सेली क्लबले दुवै खेलाडीको सम्झौता लम्ब्याउने प्रयास गरिरहेको छ । यता रामोस मात्र पछिल्लो समय पिएसजीसँग जोडिएका ठूला नाम होइनन् । गत सिजन च्याम्पियन्स लिगको फाइनलमा पराजित पिएसजीले लिओनेल मेस्सी र क्रिस्टियानो रोनाल्डोमाथि पनि नजर राखेको छ । यद्यपि यी दुईबारे भने क्लबले ठोस कदम अघि चालेको छैन ।
