काठमाडौँ – सत्तारुढ नेपाल कम्युनिस्ट पार्टी (नेकपा) को सचिवालय बैठकमा महासचिव विष्णु पौडेलको जन्मदिन मनाइएको छ । मङ्गलबार दिउँसो प्रधानमन्त्री निवास बालुवाटारमा सचिवालय बैठक शुरु हुनुअगाडी पौडेलको जन्मदिन मनाइएको हो।
महासचिव पौडेललाई ६२ औं जन्मदिनको अवसरमा केक काटेर शुभकामना दिँदै सचिवालय बैठक शुरु भएको प्रधानमन्त्रीका प्रेस सल्लाहकार सूर्य थापाले बताएका छन्।
“महासचिव कमरेड विष्णुप्रसाद पाैडेललाई जन्मदिनकाे शुभकामना दिंदै पार्टी सचिवालयकाे बैठक शुरूभएकाे छ । प्रधानमन्त्री तथा अध्यक्ष केपी शर्मा ओली र अर्का अध्यक्ष पुष्पकमल दाहाल”प्रचण्ड”, उपप्रधानमन्त्री ईश्वर पाेखरेलका साथै वरिष्ठ नेता कमरेडहरूले केक खुवाएर महासचिवलाई जन्मदिनकाे बधाई तथा स्वस्थ जीवनकाे शुभकामना व्यक्त गर्नुभएको छ ।”,जन्मदिन मनाइएको बारे जानकारी दिँदै थापाले फेसबुकमा लेखेका छन्।
पार्टी उपध्यक्ष वामदेव गाैतमले १०० बर्ष बाँच्नुहाेस् र राम्राे काम गरेर जानुहाेला भन्दै शुभकामना दिएको थापाले फेसबुकमा उल्लेख गरेका छन्। पौडेललाई जन्मदिनको शुभकामना दिएपछि नेकपा बैठक सुरु भएको थापाले बताए ।
नेपाल कम्युनिस्ट पार्टीभित्र अध्यक्षद्वय केपी शर्मा ओली र पुष्पकमल दाहालबीच चलिरहेको विवादका बीच पार्टीको सचिवालय बैठक बसिरहेको छ। मङ्गलबारको बैठकमा प्रधानमन्त्री तथा पार्टी अध्यक्ष केपी ओली तथा कार्यकारी अध्यक्ष पुष्पकमल दाहाल ‘प्रचण्ड’ ले प्रस्तुत गरेको प्रस्तावमाथि छलफल गर्ने कार्यसूची रहेको छ।
