एजेन्सी – बार्सिलोनाले ला लिगामा शनिबार अर्को धक्का बेहोर्नु परेको थियो । बार्सिलोना काडिजसँग २–१ ले स्तब्ध भएको थियो । रोनाल्ड कोम्यानको टोलीले यो सिजनको सुरुवात खराब ढंगले गरेको छ ।
१० खेलमा क्याटलान टोली मात्र १४ अंक जोड्न सफल भएको छ । २६ अंकका साथ एट्लेटिको म्यड्रिड लिगको शीर्ष स्थानमा छ । बार्सिलोनाको रेलिगेसन क्षेत्रमा रहेको टोलीको भन्दा मात्र ३ अंक बढी छ ।
४ जित, २ बराबर र ४ हारका साथ टोलीले अहिले सम्म १४ अंक बटुलेको हो । सन् १९८७र८८ यता टोलीको यो अहिले सम्मकै खराब सुरुवात हो । त्यति बेला टोलीले छैटौं स्थानमा रहँदै लिगको अन्त्य गरेको थियो ।
तत्कालिन प्रशिक्षक टेरी भेनाबेल्सलाई क्लबले ४ खेल पछि नै बर्खास्त गरेको थियो । त्यो भन्दा पनि अहिलेको सिजन बार्सिलोनाको सुरुवात खराब रहेको छ । जबकी त्यति बेला जितेको २ अंक थियो भने अहिले ३ अंक प्राप्त गर्ने नियम छ ।
कमजोर रक्षापंक्ति
बार्सिलोनाको रक्षापंक्तिको प्रदर्शन पनि निकै ओरालो लाग्दै जान थालेको छ । रक्षापक्तिमा गम्भिर गल्तिहरु भएका छन् । यो सिजन खेलेका १० खेलमा टोलीले ६ खेलमा पहिला गोल खाएका छ ।
त्यसरी पहिला गोल खाएका कुनै पनि खेल बार्सिलोनाले जित्न सकेको छैन । कोम्यानको टोलीले ३ खेलमा मात्र क्लिन सिट्स राख्न सफल भएको छ । टोलीले अहिले सम्म ११ गोल खाइसकेको छ ।
यो सिजन टोलीले ५ अवे खेलमा एक मात्र खेल जितेको छ । सेल्टा भिगोलाई मात्र टोली उसकै मैदानमा हराउन सफल भएको छ । त्यसबाहेक अवे खेलमा टोली गेटाफे, एट्लेटिको र काजिडसँग पराजित भएको थियो । अल्भेससँगको खेल भने बराबरीमा टुंगिएको थियो ।
आक्रमण
फरवार्ड लाइन अहिले पनि चुस्त मानिन्छ । टोलीले यो सिजनका १० खेलमा २० गोल गरिसकेको छ । तर, विगतको टोलीकै तुलनामा भने यसलाई प्रभावशाली मान्न सकिन्न ।
यो सिजन टोलीले औसतमा ४५ मिनेटमा एक गोल गरेको छ । जुन १२ वर्षमा टोलीको कमजोर फिनिसिङ हो । कोम्यानको टोलीले एक गोलका लागि औसतमा तीन सर्ट प्रहार गरेको छ । यो पनि पछिल्लो १३ वर्षमा खराब तथ्याङ्क हो ।
ला लिगाको यो सिजनमा लयमा फर्कन टोलीसँग अझै समय बाँकी छ । तर त्यसका लागि प्रशिक्षक र टोलीको लय भने मिल्नुपर्ने हुन्छ । लिग जित्नेमा कोम्यान कम आशावादी देखिन्छन् । काडिजसँगको हार पछि उनले भनेका थिए, ‘लिग जित्ने सम्भावनाका लागि हाम्रा कदम पछाडितर्फ धकेलिएका छन् ।’
