च्याम्पियन्स लिग २०२०-२१ को राउण्ड अफ १६ को ड्र सोमबार सार्वजनिक भयो। गत सिजनको फाइनालिस्ट पेरिस सेन्ट जर्मेनले प्री-क्वाटर फाइनलमा नै स्पेनिश महारथी बार्सिलोनाको सामना गर्ने भएको छ। यस्तोमा २०१७ मा २२२ मिलियन डलरमा बार्सिलोनाबाट पीएसजी गएका नेइमर पहिलो पटक बार्सिलोनाको सामना गर्नेछन्।
यस्तोमा, च्याम्पियन्स लिग राउण्ड अफ १६ को ड्र सार्वजनिक भएसँगै नेइमारले आफ्नो साथी लियोनल मेस्सीलाई एक सन्देश पठाएका छन्। नेइमारले आफ्नो इन्स्टाग्राम च्यानलमा मेस्सीसँगको फोटो राख्दै छिटै भेट हुनेछ साथी भनेर लेखेका छन्। उनले लेखे,”हामी एक अर्कालाई छिट्टै भेट्नेछौं, साथी।”
View this post on Instagram
बार्सिलोनामा हुँदा मेस्सी र नेइमार बीच निकै गहिरो मित्रता थियो। नेइमार पीएसजी गएपनि उनीहरुको मित्रतामा भने कुनै कमी आएको छैन। नेइमार पीएसजीको लागि प्रस्थान गरेपछि ब्राजिलियन स्टार क्याटालोनिया फर्कन चाहेको कुरा पनि चल्यो। नेइमारले पनि बार्सिलोना फर्कन निकै प्रयास गरे तर त्यो सफल हुन सकेन।
हालै मात्र नेइमारले मेस्सीसँग फेरी खेल्ने आफ्नो चाहना रहेको कुरा मिडियामा आएसँगै मेस्सी पीएसजी जाने चर्चा चलेको छ। तर त्यो सबैभन्दा पहिला अब यी दुई स्टार च्याम्पियन्स लिगको राउण्ड अफ १६ मा एक-अर्काको आमने-सामने हुने भएका छन्। नेइमार अहिलेको समयमा भने घाइते छन् तर फेब्रुवरी र मार्चमा यी दुई बीचको भिडन्त हुँदा उनी फिट हुने आशा गरिएको छ।
