एजेन्सी – स्पेनिस ला लिगाको शीर्षस्थानमा रहेको रियल सोसिडाडमाथि क्याटलान क्लब बार्सिलोनाले २–१ को पूनरागमन जित हात पारेको छ ।
घरेलु मैदान नोउक्याम्पमा बुधबार राति भएको खेलमा बार्सिलोनाको जितमा जोर्डी अल्वा र फ्रान्की डि जोङले गोल गर्दा सोसिडाडका विलियम जोसले गरेको गोल सान्त्वना बन्यो । सबै तीन गोल पहिलो हाफमा सम्भव भएको थियो ।
खेलको २७औं मिनेटमा विलियम जोसले क्रिस्टियन पोर्टुको पासमा गोल गरेपछि घरेलु टोली खेलमा पछ परेको थियो । ३१औं मिनेटमा जोर्डी अल्वाले गोल गर्दै खेललाई १–१ गोलको बराबरीमा ल्याए । एन्टोइन ग्रिजमनको प्रहार डिफ्लेक्ट भएर फर्कदा कसैको निगरानीमा नरहेका अल्वाले गोल गर्न सफल भएका थिए ।
३७औं मिनेटमा ग्रिजमनको प्रहार क्रसबारमा लागेर फर्कदा बार्सिलोनाले खेलमा अग्रता लिने अवसर गुमायो । जोर्डी अल्वाको क्रस पास डिफ्लेक्ट हुदा फ्रान्की डि जोङले गोल गर्दै बार्सिलोनालाई २–१ को अग्रता दिलाए । भिएआरको सहायतामा उनको गोलले मान्यता पाएको थियो ।
५५औं मिनेटमा सर्जियो बुस्क्वेट्सले सुवर्ण अवसर खेर फाले । ७३औं मिनेटमा पेड्रीले एलेक्सान्डर इसाकको प्रहारलाई ब्लक गर्दै बार्सिलोनाको अग्रता कायमै राखे । ७६औं मिनेटमा सोसिडाडले रोनाल्ड एराउजोले पेनाल्टी बक्समा ह्यान्ड गरेको भन्दै पेनाल्टी अपिल गरेपनि भिएआरबाट बान्यता पाएन ।
७८औं मिनेटमा मेरिनोको भली प्रहारलाई मिग्वेजाले ब्लक गरेपनि रिवाउन्ड भएको बलमा इसाकले क्रस गरेको बललाई नाचो मोनरियलले गरेको प्रहार पोस्टनजिकैबाट बाहिरिदा सोसिडाड बराबरीबाट चुक्यो ।
८४औं मिनेटमा गोलरक्षक मार्क आन्दर टेर स्टेगनले दोहोरो बचाउ गर्दै बराबरी टारे । विलियन जोसको प्रहारलाई विफल पारेका टेर स्टेगनले रिवाउन्डमा इसाकको प्रहारलाई पनि विफल पार्दे खेलमा बार्सिलोनाको अग्रता कायम राखे ।
यो जितसँगै बार्सिलोना १२ खेलबाट २० अंक जोडेर पाँचौ स्थानमा उक्लदा पराजित सोसिडाड गोलअन्तरमा पछि पर्दै दोस्रो स्थानमा झरेको छ । सोसिडाडको १४ खेलबाट २६ अंक रहेको छ । शीर्षस्थानको एट्लेटिको मड्रिडको ११ खेलबाट २६ अंक रहेपनि गोलअन्तरमा शीर्षस्थानमा छ ।
