एजेन्सी – पोर्चुगिज सुपरस्टार फरवार्ड क्रिस्टियानो रोनाल्डोले पेनाल्टी चुकाउदा युभेन्टस घरेलु मैदानमा एटलान्टासँग १–१ गोलको बराबरीमा रोकिएको छ ।
एलिएन्ज एरिनामा बुधबार राति भएको खेलमा युभेन्टसका लागि फेडरिको चिसाले गोल गर्दा एटलान्टाका रेमो फ्रिउलेरले बराबरी गोल फर्काएका थिए । खेलको पाँचौ मिनेटमा नै रोनाल्डाले सुवर्ण अवसर खेर फालेका थिए ।
१२औं मिनेटमा रोनाल्डोको पासमा अल्भारो मोराटाको प्रहार पोस्ट नजिकैबाट बाहिरिदा युभेन्टसले अग्रा लिन सकेन । २९औं मिनेटमा चिसाले रोड्रिगो बेन्टानकरको पासमा गोल गरेका थिए । ३७औं मिनेटमा रुस्लान मालिनोभ्स्कीको प्रहार पोस्ट नजिकैबाट बाहिरिदा एटलान्टा बराबरीबाट चुक्यो ।
४१औं मिनेटमा रुस्लान मालिनोभ्स्कीको शक्तिशाली प्रहारलाई युभेन्टसका गोलरक्षक सेजेस्नीले मुस्किलले बचाउदै बराबरी टारे । ४८औं मिनेटमा मोराटाले सुवर्ण अवसर चुकाउदा अग्रता दोब्बर पार्नबाट चुक्यो । ५७औं मिनेटमा रेमो फ्रिउलेरले गोल गर्दै खेललाई १–१ गोलको बराबरीमा ल्याए ।
६१औं मिनेटमा युभेन्टसले पेनाल्टीमार्फत अग्रता लिने अवसर पाएपनि रोनाल्डो चुके । फेडरिको चिसामाथि हेन्स हाटेनबोइरले पेनाल्टी बक्समा लडाएपछि प्राप्त पेनाल्टीमा रोनाल्डोको प्रहारलाई गोलरक्षक गोलिनीले बचाए । लगत्तै ६२औं मिनेटमा मोराटाको प्रहारमा गोलिनीले बाधक बने ।
६३औं मिनेटमा म्याथ्थिज डि लेग्टको हेडरलाई गोलिनीले विफल पार्दै खेललाई बराबरीमै कायम राखे । ६६औं मिनेटमा रुवेन गोसेन्सको प्रहारमा युभेन्टसका गोलरक्षक सेजेस्नी बिट भएपनि उनको प्रहारले पोस्टको दिशा लिन सकेन ।
८६औं मिनेटमा रोनाल्डोको प्रहार पोस्ट नजिकैबाट बाहिरिदा युभेन्ट्स जितबाट वञ्चित बन्यो । यो बराबरीसँगै युभेन्टस १२ खेलबाट २६ अंक जोडेर तेस्रो स्थानमा रहँदा एटलान्टा १८ अंक जोडेर आठौं स्थानमा रहेको छ ।
सिरी ‘ए’ कै अर्काे खेलमा शीर्षस्थानको एसी मिलान जिनोआसँग २–२ गोलको बराबरीमा रोकिदा इन्टर मिलानले नेपोलीमाथि १–० को जित निकालेको छ ।
मिलानका डाभिड कालाब्रिया र पिएरे कालुलुले गोल गर्दाै जिनोआका माटिया डेस्ट्रोले दुवै गोल गरे । यो बराबरीले मिलान १२ खेलबाट २८ अकंक जोडेर शीर्षस्थानमा यथावत रहेको छ । जिनोआ ७ अंक जोडेर १८औं स्थानमा छ ।
यता, रोमेलु लुकाकुको पेनाल्टी गोलमा नेपोलीमाथि जित निकालेको इन्टर मिलान २७ अंक जोडेर दोस्रो स्थानमा यथावत रहेको छ । नेपोली २३ अंक जोडेर चौथो स्थानमा रहेको छ ।
