बलिउड अभिनेता शाहिद कपूर अहिले आफ्नो आउँदो फिल्मको तयारीमा निकै व्यस्त छन्। हालैको खबर अनुसार शशांक खेतानको निर्देशनमा बन्ने फिल्म ‘योद्धा’ मा देखिनेछन्। यो फिल्म करण जोहरको ब्यानर धर्मा प्रोडक्शनले बनाउन लागेको हो।
यसैबीच खबर आएको छ कि शाहिदले यस फिल्ममा काम गर्न इन्कार गरेका छन्। फिल्म शूटिङ सुरु हुनु अघि फिल्म निर्माता र शाहिद बीच विवाद भएको छ। फिल्मको स्क्रिप्टको विषयलाई लिएर शाहिद र निर्माताबीच केही मतभेद भएको बताईएको छ। जसपछि शाहिद आफैँले फिल्मबाट हात झिके।
फिल्म ‘कबिर सिंह’ को सफलता पछि शाहिद आफ्नो आगामी प्रोजेक्टहरु एकदमै सोचविचार गरेर छनोट गरिरहेका छन्। यस बाहेक शूटिङ डेट्समा पनि उनी निकै आनाकानी गरिरहेका छन्। रिपोर्टस अनुसार शाहिदको यस्तो व्यवहारको कारण करण जोहरले आफ्नो यस फिल्म बारे आधिकारिक रुपमा घोषणा पनि गर्न पाएका छैन भनेर गुनासो गरेका छन्।
अब यो हेर्न बाँकी छ कि शाहिदले आफूलाई फिल्मबाट अलग गरेपछि शशांक र करणले उनलाई फकाउने प्रयास गर्छन् या नयाँ अभिनेता खोजी गर्छन्। शहिदले यो फिल्मको लागि जुन डेट निकालेका थिए, त्यो उनले आफ्नो डेब्यु वेब सिरिजको लागि राखे।
‘योद्धा’ एक एक्सन फिल्म हुनेछ। निर्माताले शहिदसँग आफ्नो यो फिल्मको शूटिङ जनवरी २०२१ देखि सुरु गर्ने तयारीमा थिए। फिल्ममा प्रमुख अभिनेत्रीको रुपमा दिशा पटानीलाई लिने चर्चा छ।
शहिद कपूरको वर्क फ्रन्टको कुरा गर्ने हो भने उनी चाँडै साउथ स्टार विजय सेतुपतिसँग डिजिटल डेब्यु गर्दै छन्। हालसम्म यस सिरिजको नाम जुरिसकेको छैन। यसको शूटिङ मुम्बई र गोवामा हुनेछ। यस सिरिजको निर्देशन राज र डिकेको जोडीले गर्नेछन्। यस बाहेक शाहिद मृणाल ठाकुरसँग फिल्म ‘जर्सी’ मा देखिनेछन्।
