पेरिस सेन्ट जर्मेनका नवनियुक्त प्रशिक्षक माउरीसियो पोचेटिनोले आफ्नो प्रशिक्षणमा ब्राजिलियन स्टार नेइमार अझ उत्कृष्ट हुने दाबी गरेका छन्। उनले नेइमारको सर्वश्रेष्ठ स्थान निर्धारण गर्न र उनीबाट उत्कृष्ट खेल निकाल्न आफूले काम गर्ने बताएका छन्। २०१७ मा बार्सिलोनाबाट पीएसजी आएका नेइमार क्लबका सबै योजनाहरूको मुख्य अंश रहेका छन्।
किलियन एम्बाप्पे, डी मारिया, इकार्डी जस्ता उत्कृष्ट स्ट्राइकरले भरिपूर्ण पीएसजीको आक्रमण पङ्क्तिमा आक्रमणलाई कसरी राम्रोसँग परिचालन गर्ने भन्ने कुरामा आफ्नो पहिलो र मुख्य ध्यान रहेको पोचेटिनो बताउँछन्।
पीएसजीको प्रशिक्षकको रूपमा पहिलो प्रेस सम्मेलनमा कुरा गर्दै पोचेटिनोले भने,”नेइमारले टोलीसँग प्रशिक्षण सुरु गरेपछि हामी उनको लागि उत्तम स्थानको बारेमा थाहा पाउन सक्छौं ताकी उनी बेस्ट हुन सकुन्।”
“मा अहिले सिस्टमको बारेमा कुरा गर्न चाहन्न। हामी हाम्रो खेलमा काम गर्नेछौं र नेइमार सहित सबै खेलाडीहरू कसरी उत्कृष्ट हुन सक्छन् भन्ने बारेमा काम गर्छौं”, पोचेटिनोले भने।
पोचेटिनोले पीएसजीका प्रशिक्षकका रूपमा आफ्नो पहिलो खेल बुधबार राति सेन्ट इटेनीसँग खेल्नेछन्।
