मुम्बई । चलचित्र ‘थप्पड’ बाट बलिउडमा चर्चामा कमाएकी अभिनेत्री तापसी पन्नुले आफ्नो ‘ट्रोल’ बनाउने व्यक्तिलाई कडा जवाफ दिएकी छन् । तापसीले सामाजिक सञ्जाल ट्विटरमार्फत प्रतिक्रिया दिँदै आफूलाई होच्याउने व्यक्तिलाई सार्वजनिक रुपमै कडा जवाफ फर्काएकी हुन् ।
भारतीय सञ्चार माध्यमले अभिनेत्री तापसीले आइतबार बिहान एउटा व्यंग्यात्मक ट्विट गरेकी थिइन् । जसमा उनले लेखेकी थिइन्, ‘अन्ततः कोरोनाको पनि उपचार सम्भव भयो । तर गलत धारणा राख्ने र अति आत्मविश्वास हुनेहरुलाई ठिक पार्ने औषधि छैन । ह्यास्ट्याग सन्डेथट्स ।’ तापसीको यो ट्विटमा एक जना ट्विटर प्रयोगकर्ताले कमेन्ट गरेका छन् । उनले भनेका छन्, ‘सबैको उपचार हुन्छ । त्यतिञ्जेल तिमीले चैं आफ्नो ख्याल राख्नू ।’ यो समाचार आजको सौर्य दैनिकमा प्रकाशित छ।
तैपनि अभिनेत्री तापसी ती प्रयोगकर्ताको यस्तो प्रतिक्रियामा मौन बस्न सकिनन् । उनले रिट्विट गर्दै जवाफ फर्काइन्, ‘सर, ख्याल राखेकै नतिजा त हो कि हामीजस्ता केही व्यक्तिहरू अझ अडेर बसेका छौं । नभए कति मान्छे हाम्रो मानसिक सन्तुलन बिगार्ने कोशिसमा लागिपरेका छन् ।’ अभिनेत्री तापसीले हिन्दीमैं जवाफ फर्काउँदै भनेकी छन्, ‘अनि साँच्चै, तपाईंको शुभकामना र चिन्ताका लागि धन्यवाद ! जबसम्म तपाईंजस्तो व्यक्ति हुनुहुन्छ, हामीलाई हाम्रो स्वास्थ्य र सोचाइमा पूर्णविश्वास छ ।’
अहिले अभिनेत्री तापसीको नयाँ चलचित्र ‘रश्मि रकेट’ को काम सकिएको भारतीय सञ्चार माध्यमले जनाएका छन् । उक्त चलचित्रमा उनी खेलाडीको भूमिकामा देखिँदैछन् । आकर्ष खुरानाले निर्देशन गरेको उक्त चलचित्रसन् २०२० मै सार्वजनिक हुने भनिएको थियो । कोरोनाका कारण यसको प्रदर्शन मिति अनिश्चित छ । कतिपय चलचित्र विश्लेषकले यो चलचित्र सन् २०२१ मा सार्वजनिक हुने अड्कल काटेका छन् ।
यस्तै, अभिनेत्री तापसीका ‘स्याबास् मिठु’, ‘लुप लपेटा’ र ‘हसिना दिलरुबा’ आगामी चलचित्र हुन् । राहुल ढोलकियाले निर्देशन गरेको ‘स्याबास् मिठु’ सन् २०२१ फ्रेबुअरी ५ मा सार्वजनिक हुने घोषणा गरिएको छ । ‘लुप लपेटा’ २९ जनवरी र ‘हसिना दिलरुबा’ को सार्वजनिक मिति भने तय हुन बाँकी नै छ ।
