एजेन्सी – ब्राजिलियन फरवार्ड नेयमारले एक गोल र अर्काे गोलको लागि असिस्ट दिएपछि पेरिस सेन्ट जर्मेन (पीएसजी) ले फ्रेन्च लिग वानमा लेन्सलाई २–१ ले पराजित गर्दै उपाधि होडलाई जीवितै राखेको छ ।
घरेलु मैदान पार्क डेस प्रिन्सेसमा अर्काे एक गोल ब्राजिलियन डिफेन्डर मार्किन्हसले गरेका थिए । लेन्सका इग्नाटिएस गनागोले एक गोल फर्काए । खेलको ३३औं मिनेटमा नेयमारको गोलबाट पीएसजीले पहिलो हाफमा १–० को अग्रता लिएको थियो । उनले जुलियन ड्राक्सलरको पासमा गोल गर्न सफल भएका थिए ।
५९औं मिनेटमा मार्किन्हसले नेयमारको पासमा गोल गर्दै पीएसजीको अग्रता दोब्बर पारे । ६१औं मिनेटमा इग्नाटिएस गनागोले गोल गर्दै खेललाई २–१ को अवस्थामा ल्याएका थिए । ८३औं मिनेटमा मोउरो इकार्डीले गोल गरेपनि भिएआरबाट मान्यता पाएन । उनी अफसाइड ठहरिएका थिए ।
जितपछि पीएसजी ३५ खेलबाट ७५ अंक जोडेर दोस्रो स्थानमा यथावत रहेको छ । शीर्षस्थानको लिलको ७६ अंक छ । पराजित लेन्स ५६ अंक जोडेर पाँचौ स्थानमा रहेको छ ।
लिलले शनिबार राति नै भएको खेलमा १० खेलाडीमा समेटिएको निसलाई २–० को पराजित गर्दै आफ्नो शीर्षतालाई कायम गरेको हो । लिलको जितमा बुराक इल्माज र मेमेद जेकी सिलिकले गोल गरे । ४८औं मिनेटमा जोर्डन लोटोम्वा दोहोरो पहेँलो कार्ड खादै मैदानबाट बाहिरिएपछि निसले दोस्रो हाफ १० खेलाडीमा समेटिएर खेल्नु परेको थियो ।
पराजित निस ४६ अंक जोडेर नवौं स्थानमा रहेको छ । लिग वानमा ३५औं राउन्डको खेल जारी रहँदा उपाधि होडमा लिल र पीएसजी बलियो देखिदा मोनाको र लियोन पनि उपाधि होडमै रहेको छ । तेस्रो स्थानको मोनाकोको ७१ तथा चौथो स्थानको लियोनको ६७ अंक छ ।
