एजेन्सी – यस सिजनको गोल्डेन बुट विजेता रहेको गोल मेसिन पोलिस फरवार्ड रोबर्ट लेवान्डोस्कीले यो समरमा जर्मन क्लब बायर्न म्युनिख छाड्न सक्ने संकेत दिएका छन् । उनले आफु खुला विचारधाराको रहेको भन्दै क्लब छाड्ने संकेतलाई बढवा दिएका हुन् ।
इंग्लिस क्लब चेल्सी र क्याटलान क्लब बार्सिलोनाले उनलाई अनुबन्ध गर्ने चासो देखाएको छ । उनको भविष्यबारे सोधिएको प्रश्नमा ३२ वर्षीय लेवान्डोस्कीले कानल प्लससँग भने, ‘म खुल्ला विचारको हुँ । मलाई बायर्न धेरै राम्रो लागेको छ । शहर उत्कृष्ट छ, यो एक उत्कृष्ट क्लब हो । नयाँ भाषा, नयाँ संस्कृति सिक्न समेत इच्छुक हुन्छु । तर यो फुटबलमा हुनेछ वा मेरो करिअर पछाडि, मलाई पनि थाहा छैन ।’
बायर्नलाई लगातार नवौं सिजन जर्मन बुन्डेसलिगाको उपाधि जिताएका उनले एकै सिजन बायर्नमा सर्वाधिक गोल गर्ने कीर्तिमान समेत बनाएका छन् । उनले यो सिजन ४१ गोल गर्दै ४७ वर्षअघि अर्थात १९७१–७२ मा गर्ड मुलरले राखेको ४० गोलको कीर्तिमानलाई भंग गरेका थिए ।
‘मलाई रेकर्डसँग खासै मतलब छैन । जब म चुनौतीहरु लिन्छु, त्यसको लागि म सदैव अघि बढ्नेछु । किनकि यसले मलाई अघि बढ्न मद्दत गर्दछ,’ लेवान्डोस्कीले भने, ‘मेरो लागि तपाईहरुको मायाले पनि लक्ष्य प्राप्त गर्न सहयोग मिल्नेछ । जुन तपाईहरु विना असम्भव जस्तै लाग्थ्यो ।’
‘इमान्दारीका साथ भन्नुपर्छ मैले त्यो कीर्तिमान नजिक पुग्नेसम्म सोचेकै थिइनँ । किनकि सिजनको केही खेल मैले गुमाएको थिए । म यसमा कुनै विशालता महसुस गर्दिन । मलाई यो साँचो महसुस हुदैन र सायद यो राम्रो चीज हो ।’
लेवान्डोस्की २०१४ देखि बायर्नमा रहेका छन् । त्यसअघि उनी २०१० देखि २०१४ सम्म अर्काे जर्मन क्लब बोरुसिया डर्टमुन्डमा रहेका थिए । लेवान्डोस्कीले बायर्नबाट ३२९ खेलमा २९४ गोल गरिसकेका छन् । उनले यो सिजन बायर्नबाट ४० खेलबाट ४८ गोल गरेका छन् ।
