एजेन्सी – फ्रेन्च लिग वान अन्तर्गत पर्सी सेन्ट जर्मेन(पिएसजी)ले आज स्ट्रासबर्गसँग खेल्दै छ। सिजनको दोस्रो खेलमा पिएसजीले स्ट्रासबर्गको सामना गर्न लागेको हो।
पिएसजी र स्ट्रासबर्ग बीचको खेल पिएसजीको घरेलु मैदानमा हुनेछ। खेल नेपाली समय अनुसार आज राति १२ बजेर ४५ मिनेटमा शुरु हुनेछ। आज स्ट्रासबर्ग पहिलो जितको खोजिमा हुनेछ भने स्टार खेलाडीले भरिएको पिएसजी सिजनको दोस्रो जितको खोजिमा हुनेछ। यस अगाडी पिएसजीले सिजनको पहिलो खेलमा नव प्रवेशी ट्रोएसमाथि २–१ को गोल अन्तरले पराजित गरेको थियो।
मेस्सी अटाएनन्
यसै साता पिएसजीसँग सम्झौता गरेका लियोनेल मेस्सी आजको खेलमा नदेखिने पक्का भएको छ। प्रशिक्षक माउरिसियो पोचेटिनोले घोषणा गरेको २२ सदस्यीय टोलीमा मेस्सीको नाम परेको छैन। आज खेल्ने खेलाडीको सूचीमा मेस्सी मात्र नभई डिफेन्डर सर्जियो रामोस पनि छैनन्। त्यस्तै हालसालै पिएसजी पुगेका गोलरक्षक जियानलुइजी डोनारुम्माले पनि आज डेब्यु नगर्ने भएका छन्। त्यस्तै ब्राजिलियन स्टार नेयमार, डिफेन्डर मार्किन्हस, मिडफिल्डर मारको भेराट्टी र डिफेन्डर लिएन्द्रो पारेडेस पनि आज देखिने छैनन्।
को-को परे ?
टोलीमा डिफेन्डर अक्रफ हाकिमी र मिडफिल्डर जिओर्जिनिओ वाइनाल्डम भने अटाएका छन्। एम्बाप्पे समेटिएको टोलीमा नाभास, रिको, फ्रान्ची, हाकिमी, किम्पेम्बे, डियालो, केहरर, बित्शिआबु, बितुमाजाला, राफिन्हा, ड्यानिलो, वाइनाल्डम, हरेरा, ड्राक्सलर, सिमोन्स, घारबी, एबिम्बे, मिचुत, सराबिया, इकार्डी, र कालिमुएन्दो रहेका छन्।
