पूर्व म्यानचेस्टर युनाइटेड कप्तान रोए किन हरेक प्रश्नको सटिक तथा सिधा उत्तर दिने व्यक्तित्वका रूपमा प्रख्यात छन्। अर्जेन्टिनी कप्तान लियोनल मेस्सीले बार्सिलोना छाडेर फ्रेन्च क्लब पीएसजीसँग अनुबन्ध भएसँगै मेस्सी-रोनाल्डो विवाद पुनः एक पल्ट चर्चामा आएको छ।
धेरैका लागि मेस्सी र रोनाल्डो बीच को उत्कृष्ट भन्ने उत्तर दिन निकै कठिन हुने गर्छ तर किनले भने यी दुई सर्वोत्कृष्ट खेलाडी मध्ये पनि को उत्कृष्ट भन्ने प्रश्नको उत्तर दिन कतै पनि हिचकिचाएनन्। यी दुई खेलाडीले पछिल्ला १२ मध्ये ११ ब्यालुन डी ओर जित्न सफल भएका छन्: मेस्सीले कीर्तिमानी ६ पटक जित्दा रोनाल्डोले ५ पटक जितेका छन्।
पूर्व युनाइटेड मिडफिल्डरलाई पूर्व बार्सिलोना कप्तान लियोनल मेस्सी भन्दा पोर्चुगिज कप्तान क्रिस्टियानो रोनाल्डो उत्कृष्ट खेलाडी हुन् भन्नेमा कुनै शंका नै छैन। स्काईको ओभरल्याप युट्युब च्यानलमा पूर्व टिममेट ग्यारी नेभिलको र्यापिड फायर प्रश्नको उत्तर दिँदै उनले भने,”रोनल्डो, हरेक हप्ता हरेक दिन रोनाल्डो।” यो पहिलो पटक भने हैन जब किनले मेस्सी भन्दा रोनाल्डो उत्कृष्ट भने।
सन् २०१८ को विश्वकप कभर गर्ने क्रममा पनि किनले रोनाल्डो मेस्सी भन्दा निकै उत्कृष्ट भएको बताएका थिए। उनले भनेका थिए,”मलाई लाग्छ मेस्सी र रोनाल्डो बीच को उत्कृष्ट भनेर विवाद चल्दै आएको छ- तर गत ६ महिनाको समयमा रोनाल्डो मेस्सी भन्दा पनि माथिल्लो स्तरमा छन्। यो कुनै ट्यालेन्ट मात्र हैन उनले निकै कठिन परिश्रम गरेका छन्। मेरो लागि रोनाल्डो मेस्सी भन्दा उत्कृष्ट हुन्।”
