काठमाडौं – स्कुटर चोरेर भाग्दै गरेको अवस्थामा एक व्यक्तिलाई प्रहरीले पक्राउ गरेको छ। स्कुटर चोरेर भागिरहेको अवस्थामा एक व्यक्तिलाई ट्राफिक प्रहरीले गोकर्णेश्वरबाट पक्राउ गरेको हो।
पक्राउ पर्नेमा सिराहा कर्जना नगरपालिका वडा नं. २ भुल्के घर भई काठमाडौँ गौरीघाट बस्ने २४ वर्षिय अर्पण महत रहेका छन्। उनलाई गोकर्णेश्वरको अर्याल गाउँबाट पक्राउ गरिएको ट्राफिक प्रहरीले जनाएको छ।
स्कुटर काभ्रे पाँचखाल घर भई गोकर्णेश्वर नयाँबस्ती बस्ने प्रविन श्रेष्ठको रहेको बताइएको छ। स्कुटर हराएपछि श्रेष्ठले भदौ ९ गते अन्दाजी १२ बजे हराएको भनि प्रहरीमा उजुरी दिएका थिए। श्रेष्ठले स्कुटर चोर्नेको हुलिया सहित उजुरी दिएको र महतलाई दिउँसो ४ बजे प्रहरीले नियन्त्रणमा लिएको महानगरीय ट्राफिक महाशाखाले जनाएको छ।
बा ७० प ५०५३ नम्बरको हरियो रङको डिओ स्कुटर चोरेपछि स्कुटरको नं. परिवर्तन गर्ने ठाउँ खोज्दै हिडिरहेको अवस्थामा महतलाई ट्राफिक प्रहरीले पक्राउ गरेको हो।
