क्लबका हिरो बनेका क्रिस्टियानो रोनाल्डोको बोली फरीएको चर्चा सुरु भएपछि म्यानचेस्टर युनाइटेडका समर्थकलाई ठूलो झड्का लागेको छ। युभेन्टस स्टार क्रिस्टियानो रोनाल्डोले प्रिमियर लिग च्याम्पियन म्यानचेस्टर सिटीसँग व्यक्तिगत रूपमा सहमती जनाएको समाचार सञ्चार माध्यममा आएसँगै रेड डेभिलका समर्थक निकै क्रोधित समेत भएका छन्।
लामो समयपछि रोनाल्डोको प्रिमियर लिगमा पुनरागमन यसरी होला भनेर युनाइटेड समर्थकले सायद नै सोचेका थिए होला। रातो जर्सीमा आफ्नो लेगेसी बनाउन सफल भएका रोनाल्डोले निलो जर्सीबाट खेल्दा युनाइटेडलाई धोका दिएको साबित हुनेछ, विशेषगरी यसअघि रोनाल्डोले आफू कहिल्यै पनि सिटीबाट नखेल्ने प्रतिवद्दता जनाएपछि।
सिटीले केन अनुबन्ध गर्न असफल भएपछि आफ्नो ध्यान रोनाल्डो तर्फ मोडेको हो। जससँगै रोनाल्डो सिटीमा सामेल हुने चर्चा चलेको छ। थुप्रै रिपोर्टहरुका अनुसार रोनाल्डो सिटीसँग अनुबन्ध हुन तयार रहेका छन् र सिटी पनि रोनाल्डोलाई क्लबमा भित्र्याउन।
प्रिमियर लिगमा फर्केको खण्डमा आफ्नो क्लबमा फर्किने विश्वास राखेका युनाईटेड समर्थकका लागि रोनाल्डोले विगतमा सिटीको विरुद्ध बोलिसकेपछि अहिले सिटीबाट नै खेल्नु तितो सत्य हुनसक्छ।
सन् २००९ मा सिटीले रोनाल्डोलाई १३५ मिलियन तिरेर क्लबमा भित्र्याउन कोशिस गरेको थियो। तर रोनाल्डोले त्यतिबेला आफूले कहिल्यै सिटीबाट नखेल्ने बताएर युनाइटेड समर्थकको हृदयमा विशेष स्थान लिन सफल भएका थिए। म्यानचेस्टर युनाइटेड छाडेर सिटी जाने सम्भावना बारे प्रश्न गर्दा रोनाल्डोले भने थिए,”नेभर”
त्यस्तै, २०१५ मा बीबीसी स्पोर्ट एडिटर डान रोआनले सिटीको योजना र प्रशिक्षक निकै राम्रो भएकोले यदि उपयुक्त प्रस्ताव आएको खण्डमा रोनाल्डो सिटीमा जाने सम्भावना बारे सोध्दा रोनाल्डोले भने,”के तपाईंलाई लाग्छ ३० वर्षमा मेरो मनाशय पैसाको कारण परिवर्तन हुन्छ ? पैसाको कुरा गर्ने हो भने सिटीसँग भन्दा कतारी क्लबसँग बढी पैसा छ। तर यो पैसाको कुरा हैन।”
तर अहिले भने रोनाल्डोले आफनो बोली फेरेको प्रष्ट हुन्छ। के रोनाल्डोले सिटीसँग अनुबन्ध भएर युनाइटेड समर्थकको सम्मान गुमाउलान् ?
