म्यानचेस्टर सिटीको सनसनीपूर्ण ट्रान्सफर अगाडी निर्णय वार्ता गर्नको लागि युभेन्टस स्टार क्रिस्टियानो रोनाल्डो क्लबको प्रशिक्षण मैदानमा आइपुगेका छन्। रोनाल्डो प्रशिक्षण गर्नलाई नभएर आफ्ना टिममेटलाई अन्तिम पटक भेट्नको लागि मात्र देखिएका हुन्। रोनाल्डो सिटीसँग आवद्ध हुने लगभग पक्का भएको छ।
मुख्य लक्ष्य रहेका ह्यारी केनले टोटनह्याम मै बस्ने निर्णय गरेको २४ घन्टा मै रोनाल्डो र सिटी बीच सम्झौता भएको खबर आएको थियो। रोनाल्डोसँग प्रिमियर लिग च्याम्पियन लगातार सम्पर्कमा रहेको स्काई स्पोर्ट्सले जनाएको छ। उक्त रिपोर्टका अनुसार अन्तिम निर्णायक वार्ताका लागि रोनाल्डो क्लबको प्रशिक्षण मैदानमा स्थानीय समय अनुसार बिहानको ९:२० मा पुगेका हुन्।
रोनाल्डोले यसअघि नै क्लब छाड्ने निर्णयका साथ आफ्नो लकर रूम पनि खाली गरिसकेको बताइएको छ। तर म्यानचेस्टर सिटीले भने युभेन्टसले माग गरेको २५ मिलियन तिर्नु नपरे र रोनाल्डोले आफ्नो पारिश्रमिक कम गर्ने निर्णय गरेको खण्डमा मात्र पोर्चुगिज स्टारलाई क्लबमा अनुबन्ध गर्ने अडान राखेको छ।
