एक सनसनीपूर्ण खुलासा अनुसार पोर्चुगिज कप्तान रोनाल्डोले आफ्नो पूर्व क्लब म्यानचेस्टर युनाइटेडको प्रस्तावलाई इन्कार गर्दै प्रतिद्वन्दी म्यानचेस्टर सिटीको प्रस्ताव स्वीकार गरेका रहेछन्। रोनाल्डोले इटालियन क्लब युभेन्टस छाड्ने लगभग पक्का भएको छ र ३६ वर्षीय स्ट्राइकरको अर्को गन्तव्य भनेको प्रिमियर लिग च्याम्पियन म्यान्चेस्टर सिटी हुने सम्भावना उच्च रहेको छ।
सन् २००९ मा प्रिमियर लिग छाडेका रोनाल्डो पुनः उक्त लिगमा पुनरागमन गर्ने अवस्थामा रहेका छन् तर रातो म्यानचेस्टर छाडेर गएका रोनाल्डो अब भने निको म्यानचेस्टरमा प्रस्थान गर्न लागेका छन्। यस्तोमा रेड डेभिलका समर्थक रोनाल्डो र म्यानचेस्टर युनाइटेडसँग क्रोधित रहेका छन्। रोनाल्डोसँग आफ्नो पूर्व क्लबको चिर-प्रतिद्वन्दीसँग सामेल हुन लागेकोमा क्रोधित भएका फ्यान्स क्लबसँग भने रोनाल्डोलाई अनुबन्ध गर्न प्रस्ताव नगरेकोमा खुसी छैनन्।
तर एक रिपोर्टका अनुसार युनाइटेडले ५ पटकका ब्यालुन डी ओर विजेता रोनाल्डोलाई अनुबन्ध गर्न प्रयास गरेको थियो। इटालियन पत्रिका ला गाज्जेटा डेल्लो स्पोर्टका अनुसार म्यान युनाइटेडले रोनाल्डोका लागि प्रस्ताव गरेको थियो तर रोनाल्डोले त्यसलाई इन्कार गर्दै सिटीलाई रोजेको दाबी गरिएको छ।
रोनाल्डोले युनाइटेडमा बिताएका ६ सिजनमा उनी विश्वस्तरीय खेलाडी भएर निस्किएका थिए। करियरको पहिलो ब्यालुन डी ओर युनाइटेडकै खेलाडीका रूपमा जितेका रोनाल्डोले क्लबका लागि ३ प्रिमियर लिगका साथै १ च्याम्पियन्स लिग समेत जितेका थिए।
