म्यानचेस्टर युनाइटेडका गोलकिपर डेभिड डेजियालाई क्लबमा क्रिस्टियानो रोनाल्डोको पुनरागमन सपना सरह लागिरहेको छ। १२ वर्षपछि म्यानचेस्टर फर्किन लागेका रोनाल्डोलाई स्वागत गर्न पूरा क्लब तथा समर्थक तत्पर रहेका छन्। आउँदो केहि दिनमा रोनाल्डो आधिकारिक रूपमा युनाइटेड खेलाडीका रूपमा सार्वजनिक हुनेछन्।
ओल्ड ट्राफर्डमा भने उनी अन्तराष्ट्रिय ब्रेकपछि मात्र पुग्ने अपेक्षा गरिएको छ। शुक्रबार क्लब र खेलाडी बीच २ वर्षीय सम्झौतामा सहमती जुटेसँगै क्लबको ड्रेसिंग रूम ५ पटकका ब्यालुन डी ओर विजेतालाई स्वागत गर्न आतुर रहेको छ। स्काई स्पोर्ट्ससँग बोल्दै डेजियाले भने,”सबै युनाइटेड समर्थक तथा खेलाडीका लागि यो सपना जस्तै हो। उनी आउनु भनेको केहि खास नै हो। उनले आफूसँग टिमलाई सुधार्ने केहि गुण लिएर आउँछन् भन्ने आशा छ।”
त्यस्तै, स्टार मिडफिल्डर पल पोग्बाले थपे,”सबैलाई थाहा नै छ। उनी क्लबका दिग्गज खेलाडी हुन् र उनी फर्कनु भनेको विशेष हो। यो हामी सबैलाई, क्लबका लागि निकै ठूलो कुरा हो।” रोनाल्डोको आगमनसँगै क्लबमा जीतको भोक अझै बढ्ने पोग्बाले बताए।
युनाइटेड प्रशिक्षक ओले गनर सोल्स्जारले क्लबको अर्को खेलमा रोनाल्डो उपलब्ध हुने आशा गरेका छन्। क्लबको अर्को खेल ११ सेप्टेम्बरमा न्युकासल विरुद्ध रहेको छ। त्यसअघि रोनाल्डो ३ अन्तराष्ट्रिय खेलका लागि पोर्चुगलसँग जोडिनेछन्।
