एमाले अध्यक्ष केपी ओलीले आफूले माधवकुमार नेपाल जस्तो लाज नभएको मानिस आजसम्म नदेखेको बताएका छन्। ओलीसँग छुट्टीएर नयाँ पार्टी निर्माण गरेका माधवकुमार नेपाललाई लक्षित गरी ओलीले टिप्पणी गरेका हुन्।
शनिबार काठमाडौं महानगर कमिटीद्वारा आयोजित एक कार्यक्रममा बोल्दै ओलीले भने,”वामपन्थी सरकार ढाल्ने, विकासका कार्य गर्दै गरेको सरकार ढाल्ने अनि क्रान्तिका कुरा गर्ने? यस्तो लाजसरम पचेको माधवकुमार नेपाल जस्ता मानिस मैले आजसम्म देखेको छैन।” नेपाल अहिले आएर कम्युनिष्ट विरोधी किन भए भनेर आफू आश्चर्यचकित भएको ओलीको भनाई थियो।
माधव कुमार नेपालले जुन मन्दिरमा पूजा गर्ने गर्थे त्यहि मन्दिरमा अहिले थुकेको ओलीले बताए। अहिले नेपालको नाम भनेको नै एमालेलाई बदनाम, कमजोर बनाउने र चरित्रह’-त्या गर्ने भएको आरोप समेत ओलीले लगाए। “नेपाल जी कसरी यस्तो कम्युनिष्ट विरोधी भए, कम्युनिष्टको नाम नै सुन्न नसक्ने भए। समाजवादी रे, कांग्रेसको एस पार्टी, वामपन्थी सरकार ढालेर, विरोधीको सरकार बनाएर अनि प्रतिक्रान्ति रोकेँ भन्ने,” ओलीले प्रश्न उठाए।
नेपालले अहिले निर्माण गरेको पार्टीमा अन्तिममा माधव नेपाल एक्लै मात्र बाँकी रहने ओलीले दाबी गरेका छन्।
