एजेन्सी – शनिबार राति पोर्चुगिज फरवार्ड क्रिस्टियानो रोनाल्डोले म्यानचेस्टर युनाइटेडका लागि दोस्रो डेब्यू गरे। १२ वर्ष पछि युनाइटेडका लागि खेल्दै उनले दुई गोल गरे। रोनाल्डोको उपस्थितले प्रेरित युनाइटेडले न्युकासल युनाइटेड माथि ४-१को जित दर्ता गर्यो। युनाइटेड विरुद्ध रोनाल्डोका अलावा ब्रुनो फर्नान्डेस र जेसे लिंगार्डले पनि गोल गरे।
रोनाल्डोको दोस्रो डेब्यू धेरै खेलाडीहरुका लागि महत्वपूर्ण रह्यो। विश्वकै उत्कृष्ट खेलाडी मध्ये एक रहेका रोनाल्डोसँग खेल्न पाउँदा युनाइटेडका धेरै जस्तो खेलाडी उत्साहित भएका थिए।
शनिबार रोनाल्डोको डेब्यू खेलमा गोल गर्ने लिंगार्ड पनि कम उत्साहित भएनन्। लिंगार्डले रोनाल्डोसँगै मैदानमा हुन पाउँदाको खुशी सामाजिक संजालमै व्यक्त गरेका छन्। लिंगार्डले रोनाल्डोसँगका केहि पूराना र नयाँ तस्विर राख्दै ठूला सपना देख्नु पर्ने बताएका छन्। उनले तस्विर सार्वजनिक गर्दै लेखेका छन्,”ड्रिम बिग किड्स !”
रोनाल्डोसँग लिंगार्डको पूराना भेट
लिंगार्ड युनाइटेडसँग करिब २० वर्ष देखि छन्। लिंगार्ड ७ वर्षको उमेरमा युनाइटेडको एकेडेमी पुगेका थिए। लिंगार्ड युनाइटेडसँग आवद्ध भएको ३ वर्ष पछि मात्रै रोनाल्डो युनाइटेड पुगेका हुन्। सोहि समयमा लिंगार्डले रोनाल्डोलाई भेट्ने मौका पाएका थिए। लिंगार्डले सोहि बेलाका केहि तस्विर र शनिबारको तस्विर सामाजिक संजालमा राखेका हुन्।
लिंगार्डले सन् २०१४ मा सिनियर टोलीमा मौका पाएका थिए। त्यसबेला रोनाल्डो रियल म्याड्रिड गैसकेका थिए। गएको केहि सिजन खासै राम्रो प्रदर्शन गर्न नसकेका लिंगार्ड गत सिजन देखि राम्रो लयमा छन्। लोनमा वेस्ट ह्याम पुगेका उनले गत सिजन सुधारिएको प्रदर्शन गरेका थिए।
