युवा स्टार किलियन एम्बाप्पेले पेरिस सेन्ट जर्मेनको नेतृत्व गर्ने क्रम जारी छ। मैदान भित्र मात्र होइन, जहाँ उनले यस सिजन चार गोल गरेका छन्, तर मैदान बाहिर र क्यामेराको अगाडि पनि पीएसजीको फ्रन्ट म्यान बनेका छन्।
नेयमार जस्ता सुपरस्टार खेलाडी रहेको क्लबले यसै सिजन ६ पटकका ब्यालुन डी ओर विजेता लियोनल मेस्सी र सर्जियो रामोस जस्ता खेलाडी अनुबन्ध गरेको छ। यस्तोमा, मेस्सी, नेयमार, रामोस जस्ता सुपरस्टारको उपस्थितिमा उनीहरुको अगाडी पीएसजीले यस सिजन आफ्नो टोलीको प्रमुख अनुहारको रूपमा २२ वर्षीय स्ट्राइकरलाई राखेको छ।
क्लबको होम र अवे जर्सीको प्रक्षेपणमा फ्रान्सेली स्टारलाई प्रमुख अनुहारको रूपमा सार्वजनिक गरेको पीएसजीले आफ्नो नयाँ किट प्रक्षेपणमा पनि सोहि क्रमलाई जारी राखेको छ। फ्रान्सेली क्लबले युवा स्टार एम्बाप्पेको बारेमा आफ्नो मनस्थिति स्पष्ट गरेको छ। समर ट्रान्सफर विन्डोमा खेलाडीको बारेमा निकै स्पष्ट रहेको पीएसजी विश्व विजेतालाई गुमाउन चाहँदैन।
जब पीएसजीले होम र अवे जर्सी मे र जुलाईमा प्रक्षेपण गरेको थियो, एमबाप्पे उक्त प्रक्षेपणको अनुहार रहेका थिए। अब क्लबको तेस्रो किटको रिलीजको नेतृत्व पनि एम्बाप्पेले गरेका छन्। लामो समयबाट स्पेनिस क्लब रियल म्याड्रिडसँग नाम जोडिएका एम्बाप्पेलाई क्लब मै राख्न फ्रेन्च क्लबले हरेक कोशिस गर्दै आएको छ।
