पूर्व म्यानचेस्टर युनाइटेड डिफेन्डर ग्यारी नेभिलले रेड डेभिल स्टार क्रिस्टियानो रोनाल्डो फुटबल इतिहास कै सर्वश्रेष्ठ खेलाडी रहेको बताएका छन्। अन्तराष्ट्रिय स्तर र च्याम्पियन्स लिगमा रोनाल्डो उत्कृष्ट रहेको बताउने नेभिलका अनुसार हरेक प्रकारको गोल(मजबूत खुट्टा, कमजोर खुट्टा र हेडिङ) गोल गर्ने भएको कारणले रोनाल्डो मेस्सी भन्दा सर्वश्रेष्ठ खेलाडी हुन्।
स्काई स्पोर्टका पण्डितका रूपमा काम गर्ने नेभिलले यस्तो धारणा राखेका हुन्। तर नेभिलको यस्तो धारणालाई उनका सहकर्मी जेमी क्यारागरले नकार्दै आफ्नो नजरमा मेस्सी रोनाल्डो भन्दा उत्कृष्ट भएको बताएका छन्। कार्यक्रममा दुबै स्टारको पूरै करियरको तथ्यांकलाई मध्यनजर गर्दै तुलना गरिएको थियो। जसमा रोनाल्डो कमजोर खुट्टाले र हेडर गोल मेस्सीको तुलनामा निकै उच्च सङ्ख्यामा गर्ने भन्दै नेभिलले ५ पटकका ब्यालुन डी ओर विजेतालाई उत्कृष्ट भएका थिए।
तर पूर्व लिभरपूल स्टारका अनुसार भने कसरी गोल भयो भन्दा पनि गोल भयो कि भएन भन्ने महत्वपूर्ण रहने कुरामा जोड दिएका छन्। “रोनाल्डो र मेस्सी दुबैको सबै प्रशंसक छन्। तर रोनाल्डो सर्वश्रेष्ठ हैनन्। मलाई लाग्छ मेस्सी हुन्। तपाईं रोनाल्डोले धेरै प्रकारको गोल गर्छन् भन्दै हुनुहुन्छ, यो फरक पर्दैन कि गोल कसरी भयो। रोनाल्डोको भन्दा मेस्सीको गोलको रेकर्ड उत्कृष्ट छ। मेस्सीले कुनै पनि खेल नियन्त्रण गर्न सक्छन्, रोनाल्डोले सक्दैनन्।”
क्यारागरका अनुसार रोनाल्डोले गर्ने चिज अन्य खेलाडीले पनि गर्न सक्ने तर मेस्सीले अरु कुनै पनि खेलाडीले गर्नै नसक्ने चिज गर्ने बताएका छन्।
