एजेन्सी – एक गोलले पछि परेको अवस्था उल्ट्याउँदै म्यानचेस्टर युनाइटेडले इंग्लिस प्रिमियर लिगमा घरेलु टोली वेस्ट ह्याम युनाइटेडमाथि पूनरागमन जित निकालेको छ । लन्डन स्टेडियममा आइतबार राति भएको खेलमा पोर्चुगिज क्रिस्टियानो रोनाल्डो र जेसे लिंगार्डले गोल गरेपछि युनाइटेडले २–१ को पूनरागमन जित निकालेको हो ।
खेलको ३०औं मिनेटमा जारोड बोओनको पासमा सेड बेनरहमाको गोलबाट घरेलु टोलीले १–० को अग्रता लिएको थियो । तर वेस्ट ह्यामको त्यो अग्रता लामो समय टिकेन । ३५औं मिनेटमा रोनाल्डोले बराबरी गोल फर्काए । बराबरीतर्फ धकेलिएको खेलको अन्त्यतिर सब्सिच्युट जेसे लिंगार्डले गोल गर्दै म्यानचेस्टर युनाइटेडलाई २–१ को पूनरागमन जित दिलाए । ७३औं मिनेटमा पल पोग्वाको स्थानमा मैदान छिरेका लिंगार्डले नेमान्जा माटिचको पासमा निकै उत्कृष्ट गोल गरेका थिए ।
मंगलबार च्याम्पियन्स लिगमा योंग बोइज विरुद्धको खेलमा गरेको ठूलो गल्तीलाई इंग्ल्याण्ड स्टारले सानदार गोल गर्दै टोलीको जीतमा निकै महत्वपूर्ण भूमिका खेले। स्विस क्लब विरुद्ध भएको खेलमा लिंगार्डको असफल ब्याक-पास कै कारण युनाइटेड २-१ को हार बेहोर्न बाध्य भएको थियो। तर त्यसको एक हप्ता पनि बित्न नपाउँदै लिंगार्डले उक्त गल्तीको भरपाई गरेका छन्।
🚀 @JesseLingard launching rockets!#MUFC | #WHUMUN pic.twitter.com/MFAeaeB594
— Manchester United (@ManUtd) September 19, 2021
यो जितसँगै अपराजित रहेको म्यानचेस्टर युनाइटेडका ५ खेलबाट १३ अंक पुगेको छ । शीर्षस्थानको चेल्सी र दोस्रो स्थानको लिभरपुलसँग अंक बराबरी गरेपनि गोल अन्तरका आधारमा युनाइटेड तेस्रो स्थानमा रहेको छ । पराजित वेस्टह्याम ८ अंक जोडेर आठौं स्थानमा रहेको छ ।
