एजेन्सी – स्पेनिस विंगर मार्काे एसेन्सियोको ह्याट्रिक तथा कप्तान करिम बेन्जेमाले दुई गोलसँगै दुई असिस्ट दिएपछि रियल म्याड्रिडले स्पेनिस ला लिगामा सानदार जित निकालेको छ । घरेलु मैदान सान्टियागो बर्नबेउमा बुधबार राति भएको खेलमा रियलले रियल मलोर्कालाई ६–१ ले पराजित गरेको हो ।
कप्तान करिम बेन्जेमाले दुई तथा इस्कोले एक गोल थपे । मलोर्काका काङ इन लिले एक गोल फर्काए । खेलको तेस्रो मिनेटमा नै कप्तान बेन्जेमाको गोलबाट रियलले अग्रता लिएको थियो ।
२४औं मिनेटमा मार्काे एसेन्सियाले गोल गर्दै रियलको अग्रता दोब्बर पारे । लगत्तै २५औं मिनेटमा काङ इन लिले गोल गर्दै खेललाई २–१ को अवस्थामा ल्याए । २९औं मिनेटमा एसेन्सियाले करिम बेन्जेमाको पासमा गोल गरेपछि रियलले पहिलो हाफमा ३–१ को आरामदयाी अग्रता लिएको थियो ।
रियलको गोलको श्रृंखला दोस्रो हाफमा पनि रोकिएन । ४९औं मिनेटमा कप्तान बेन्जेमाले गोल गरेपनि भिएआरबाट उनको गोलले मान्यता पाएन । उनी भिएआरमा अफसाइड देखिएको थियो । ५५औं मिनेटमा एसेन्सियाले बेन्जेमाको पासमा ह्याट्रिक पुरा गर्दा रियलले ४–१ को अग्रता लिन सफल भयो । उनले बेन्जेमाको पासमा गोल गर्न सफल भएका थिए ।
७८औं मिनेटमा बेन्जेमाले डेभिड अलाबाको पासमा व्यक्तिगत दोस्रो तथा टोलीका लागि पाँचौ गोल गर्दा रियल फराकिलो जिततर्फ अग्रसर बन्यो । ८४औं मिनेटमा सब्सिच्युट इस्कोले भिनियिस जुनियरको पासमा गोल गर्दै टोलीलाई ६–१ को फराकिलो जित दिलाए । इस्को ७२औं मिनेटमा एसेन्सियाको स्थानमा मैदान छिरेका थिए ।
जितसँगै अपराजित रहेको रियल ६ खेलबाट १६ अंक जोडेर शीर्षस्थानमा उक्लिएको छ । रियलले दोस्रो स्थानको शहरी प्रतिद्धन्द्धी एट्लेटिको म्याड्रिडलाई २ अंकले पछि पारेको छ । पराजित मलोर्का ८ अंक जोडेर १०औं स्थानमा झरेको छ ।
अन्य नतिजा
स्पान्योलविरुद्ध एलाभेस (१–०)
सेभियाविरुद्ध भ्यालेन्सिया (३–१)
भिल्लारियलविरुद्ध इल्चे (४–१)
