एजेन्सी – स्पेनिस ला लिगाको नयाँ सिजन २०२१–२२ को ‘एल क्लासिको’ अर्थात बार्सिलोना र रियल म्याड्रिडबीचको खेलको मिति र समय तय भएको छ ।
ला लिगाको १०औं राउन्डमा हुने सिजनको पहिलो एल क्लासिको क्याटलान क्लब बार्सिलोनाको घरेलु मैदान क्याम्प नोउमा हुनेछ । खेल अर्काे महिना अर्थात २४ अक्टोवरमा नेपाली समयअनुसार राति ११:४५ बजे हुनेछ । क्लासिकोमा लामो समयपछि लियोनेल मेस्सी हुनेछैनन् । उनी यसै समरमा फ्रान्सेली क्लब पीएसजी पुगेका छन् ।
दुवै टोली च्याम्पियन्स लिगको समूह चरणको तेस्रो राउन्डपछि क्लासिकोमा उत्रनेछन् । च्याम्पियन्स लिगमा बार्सिलोनाले घरेलु मैदानमा २० अक्टोवरमा डिनामो किएभसँग तथा रियलले साख्तर डोनेस्कसँग १९ अक्टोवरमा खेल्दैछ ।
नयाँ सिजनमा रियल म्याड्रिडले उच्च प्रदर्शनलाई निरन्तरता दिइरहँदा बार्सिलोना आफ्नो लयमा फर्कन सकेको छैन । चोटका कारण प्रमुख खेलाडीहरु मैदान बाहिर रहेपछि बार्सिलोना समस्यामा छ । रियलका करिम बेन्जेमा करिअरकै उच्च लयमा रहेको छ । उनले ला लिगाको सुरुवाती ६ खेलमा ८ गोल र ७ असिस्ट दिएका छन् । भिनिसियस जुनियरले ६ खेलमा ५ गोल र २ असिस्ट दिएका छन् ।
ला लिगाको छैटौं चरणको खेल सकिँदा रियल म्याड्रिड ५ जित र १ बराबरीका साथ १६ अंक जोडेर शीर्षस्थानमा रहेको छ । अपराजित नै रहेपनि बार्सिलोनाले ५ खेलमा २ जित र ३ बराबरीका साथ ९ अंक जोडेर सातौं स्थानमा रहेको छ । रियलले बार्सिलोनालाई ७ अंकले पछि पारिसकेको छ ।
बिहीबार राति बार्सिलोना क्याडिजसँग गोलरहित बराबरीमा रोकिन पुगेको थियो । त्यसको अघिल्लो दिन रियलले रियल मलोर्कामाथि ६–१ को सानदार जित निकालेको थियो । क्लासिको अघि दुवै टोलीले तीन ला लिगाका खेल र दुई च्याम्पियन्स लिगको खेल खेल्नेछन् । रियलले भिल्लारियल, एफसी सेरिफ स्पान्योल, एथलेटिको बिल्वाओ र साख्तरसँग खेल्नेछ । बार्सिलोनाले लेभान्टे, बेन्फिका, एट्लेटिको म्याड्रिड, भ्यालेन्सिया र डिनामो किएभसँग खेल्नेछ ।
यो सिजन रियल म्याड्रिड सुरुवाती ७ खेलमा अपराजित छ । जसमा ६ जित र एक बराबरीको नतिजा छ । बार्सिलोनाले ६ खेलमा दुई जित, ३ बराबरी र एक हारको नतिजा निकालेको छ ।
यसै समरमा बार्सिलोना आएका अर्जेन्टिनी फरवाड सर्जियो अगुएरो र औसमाने डेम्वेलेले रियलविरुद्ध खेल्ने सम्भावना छ । अन्सु फाती, मार्टिन ब्रेथवेट र पेड्रीले खेल्ने सम्भावना न्युन छ । यता, रियलका टोनी क्रुस, ग्यारेथ बेल र फर्लान्ड मेन्डीले चोटबाट पूनरागमन गर्न सक्नेछन् ।
रियल र बार्सिलोनाबीचको पछिल्लो २९ खेलको नतिजामा बार्सिलोना १६ खेलमा विजयी भएको छ । रियलले १३ खेल जित्दा १० खेल बराबरीमा सकिएको छ । रियल पछिल्लोपटक ३ मार्च २०१९ मा घरेलु मैदानमा १–० ले पराजित भएको थियो । त्यसयता पछिल्लो चार खेलमा रियल बार्सिलोनासँग अपराजित छ । जसमा ३ जित र १ बराबरीको नतिजा छ ।
एल क्लासिकोमा यि दुई टोली आधिकारिक खेलमा २४६ पटक खेलेका छन् । जसमा रियलले ९८ खेल आफ्नो पक्षमा पारेको छ । ९६ खेल बार्सिलोनाको पक्षमा रहँदा ५२ खेल बराबरीमा सकिएको छ ।
