इंग्ल्याण्ड स्टार जेसे लिंगार्डले क्रिस्टियानो रोनाल्डोलाई म्यानचेस्टर युनाइटेडको प्रशिक्षणमा आफ्नो सिग्नेचर सेलिब्रेसन सिकाइरहेका छन् जसपछि उनी आफ्नो आइडललाई मद्दत गरिरहेको ठट्टा पनि गर्दैछन्। गत सिजन लोनमा वेस्ट ह्याम गए देखि नै उत्कृष्ट लयमा रहेका मिडफिल्डरले यस सिजन युनाइटेडका लागि २ गोल गरिसकेका छन्।
लिंगार्डले प्रशिक्षक ओले गुनर सोल्सजायरको टोलीमा नियमित स्टार बन्ने प्रयास गरिरहेका छन् तर यस सिजन उनले प्रतिस्थापित हुँदै मैदान प्रवेश गरेर तहल्का मच्चाउँदै आएका छन्। गोल गरेपछि आफ्नो औंलाको मद्दतले आफ्नो नामको पहिलो अक्षर बनाएर सेलिब्रेसन गर्ने गरेका उनले सेलिबेसनका कारण पनि चर्चा पाउने गरेका छन्।
उनले आफ्नो इन्स्टाग्राममा एक तस्बिर पोस्ट गरेका छन् जसमा जेसेले रोनाल्डोलाई आफ्नो अनुकरण कसरी गर्ने भनेर देखाईरहेका छन्। उनले क्याप्सनमा लेखेका छन्: “सबैले सहयोगी हात बढाउन सक्छन्…. हामी अन्तमा त्यहाँ पुग्यौं।”
म्यानचेस्टर युनाइटेडमा रोनाल्डोले पहिलो कार्यकाल बिताईरहँदा लिंगार्ड क्लबको युथ एकेडेमीमा रहेका थिए। इंग्ल्याण्ड अन्तराष्ट्रिय स्टारले पोर्चुगिज कप्तानलाई आफ्नो आइडलको रूपमा लिने गरेका छन्। यसै सिजन मात्र रेड डेभिलसँग आवद्ध भएका रोनाल्डोले म्यानचेस्टरमा निकै उत्कृष्ट सुरुवात गरेका छन्। उनले क्लबका लागि अहिलेसम्म ४ खेलमा ४ गोल गरेका छन्।
