क्रिस्टियानो रोनाल्डो एक पटक फेरी म्यान्चेस्टर युनाइटेडका लागि म्याचविनरको रूपमा उभिए। बुधबार राति च्याम्पियन्स लिगमा भिल्लारियल विरुद्धको खेलमा रोनाल्डोले गरेको अन्तिम समयको गोलले ओल्ड ट्राफोर्डमा महत्वपूर्ण जीत दिलायो।
पाको अल्कासेरले दोस्रो हाफमा साबिक युरोपा विजेताको लागि गोल गर्दै घरेलु टोलीलाई खेलमा पछि पारेका थिए। तर एलेक्स टेलेस र रोनाल्डोको गोलको मद्दतमा म्यानचेस्टर युनाइटेडले उत्कृष्ट पुनरागमन जीत निकाल्न सफल भयो। यसै सिजन मात्र म्यानचेस्टर फर्किएका रोनाल्डोले क्लबका लागि ५ खेलमा ५ गोल गरिसका छन्।
गयराती क्लबका लागि विजयी गोल गरेपछि ५ पटकका ब्यालुन डी ओर विजेताले आफ्ना समर्थकलाई एक सन्देश दिँदै असिमित प्रेम तथा समर्थनका लागि आभार प्रकट गरेका छन्। उनले भने,”मैले सबै समर्थकलाई धन्यबाद दिनुपर्छ। मेरो तर्फबाट मात्र हैन पूरै टिमको तर्फबाट, हामीलाई विश्वास दिएकोमा र समर्थन गरेकोमा। आज ३ अंक प्राप्त नगरेको भए अगाडी बढ्न निकै कठिन हुने थियो। अब जे पनि सम्भव छ। हामी अर्को चरणमा पुग्छौं भन्ने विश्वास छ।”
“यसैका लागि म म्यानचेस्टर फर्किएको हुँ। मैले यो क्लबलाई धेरै याद गर्ने गर्थें। मैले यस क्लबमा इतिहास बनाएको छु र म फेरी पनि त्यो काम दोहोराउन चाहन्छु,” ३६ वर्षीय पोर्चुगिज स्टारले भने।
