लिभरपुल स्टार मोहम्मद सलाह हाल प्रिमियर लिगको बेस्ट प्लेयर रहेको बताइएको छ। क्वीन्स पार्क रेंजर्स स्ट्राइकर चार्ली अस्टिनले इजिप्टियन स्टारलाई रोनाल्डो, केभिन डी ब्रुएन जस्ता स्टार भन्दा पनि उत्कृष्ट बताएका छन्।
सिजनको शानदार सुरुवात गरेका लिभरपुलका फरवार्ड मोहम्मद सलाहले दर्शक र फुटबलरहरुबाट प्रशंसा कमाइरहेका छन्। त्यस मध्ये नै एक हुन् रेंजर्स स्ट्राइकर चार्ली अस्टिन। टकस्पोर्टसँगको एक अन्तर्वार्तामा चार्ली अस्टिनले दाबी गरे कि मोहम्मद सलाह अहिले युरोपका कुनै पनि टोलीको सुरुवाती ११ मा पर्ने खेलाडी हुन्। सलाहको उत्कृष्ट प्रदर्शनलाई मध्यनजर गर्दै उनले सलाहलाई हाल प्रिमियर लिग कै सर्वश्रेष्ठ खेलाडी रहेको दाबी गरेका छन्।
अहिले प्रिमियर लिगका उत्कृष्ट खेलाडीको कुरा गर्दा अस्टिनले मोहम्मद सलाहलाई क्रिस्टियानो रोनाल्डो र केभिन डी ब्रुइन भन्दा अगाडि आफ्नो मत दिए। उनले भने,”प्रिमियर लिगमा अहिले बेस्ट प्लेयरको कुरा गर्दा मेरो लागि लिभरपुल स्टार मोहम्मद सलाह नै सर्वोत्कृष्ट हुन्।” गत महिना प्रिमियर लिग शुरू भएयता इजिप्टियन स्टार छुट्टै स्तरमा रहेका छन्।
उनले प्रिमियर लिगमा ५ गोल गर्दा च्याम्पियन्स लिगमा २ खेलमा ३ गोल गरेका छन्। उनी प्रिमियर लिगमा यो सिजन सर्वाधिक गोलकर्ताको सूचीमा पहिलो स्थानमा रहेका छन्। २९ वर्षीय स्टारको उत्कृष्ट लयका कारण लिभरपुल प्रिमियर लिग र च्याम्पियन्स लिगको समूह ‘बी’ दुबैको शिर्ष स्थानमा रहेको छ। सलाहका साथै अन्य खेलाडी पनि निकै लयमा रहेको कारण पनि यस सिजन लिभरपुललाई प्रिमियर लिग तथा च्याम्पियन्स लिग उपाधि जित्ने दाबेदारको रूपमा हेरिएको छ।
