एजेन्सी –उरुग्वेली फरवार्ड लुइस सुआरेजले पुर्व क्लबविरुद्ध एक गोल र अर्काे असिस्ट दिएपछि स्पेनिस ला लिगामा क्याटलान क्लब बार्सिलोनाले एट्लेटिको म्याड्रिडसँग हार बेहोरेको छ ।
वान्डा मेट्रोपोलिटानोमा शनिबार राति भएको खेलमा घरेलु टोली एट्लेटिकोको जितमा थोमस लेमार र लुइस सुआरेज गोल गरेपछि बार्सिलोनाले २–० को हार बेहोरेको हो । दुवै गोल पहिलो हाफमा भएको थियो ।
खेलको २४औं मिनेटमा थामस लेमारको गोलबाट एट्लेटिकोले अग्रता लिएको थियो । उनले लुइस सुआरेजको पासमा गोल गरेका थिए । ४४औं मिनेटमा सुआरेजले थोमस लेमारको पासमा गोल गरेपछि एट्लेटिकोले पहिलो हाफमा २–० को अग्रता लिएको थियो ।
दुई गोलले पछि परेको बार्सिलोनाले घरेलु टोलीमाथि बल पोसेसन राख्दै दवाव बढाएपनि फिनिसिङमा चुक्दा ला लिगामा सिजनको पहिलो हार बेहार्न पुग्यो । एट्लेटिकोले भने आफुले लिएको अग्रता जोगाउँदै ला लिगामा अपराजित रहन सफल भयो ।
यो जितपछि अपराजित रहेको एट्लेटिकोले ८ खेलबाट १७ अंक जोड्दै शीर्ष स्थानको रियल म्याड्रिडसँग अंक बराबरी गरेपनि गोल अन्तरमा दोस्रो स्थानमा रहेको छ । दुवै टोलीको समान १७ अंक छ । रियलले एक खेल कम खेलेको छ । पराजित बार्सिलोना ७ खेलबाट १२ अंक जोडेर नवौं स्थानमा रहेको छ ।
