एजेन्सी – पेरिस सेन्ट जर्मेन (पिएसजी) ले सिजनको पहिलो हार बेहोर्ने क्रममा फ्रान्सेली लिग १ अन्तर्गत शनिबार रेनेससँग हार बेहोरेको छ । रेनेसको मैदानमा भएको खेलमा पिएसजी २-० ले पराजित भएको हो ।
लिगको शीर्षस्थानमा रहेको पिएसजीले सिजनको पहिलो हार बेहोरेको खेलमा आफ्नो पहिलो रोजाइको टोली नै उतारेको थियो । लिओनेल मेस्सी, नेयमार र किलीयन एमबाप्पे सम्मिलित आक्रमणले खेल अवधिभर थुप्रै अवसर सिर्जना गरेपनि गोल गर्न भने सकेनन् । यता रेनेसले भने पहिलो हाफको अन्तिम मिनेट र दोस्रो हाफको पहिलो मिनेटमा गोल गर्दै जित हासिल गरेको हो ।
खेलको ४५ औं मिनेटमा गैतान लाबोर्डले रेनेसको लागि गोल गरेका थिए । उनले कमलदिन सुलेमानाको क्रसमा गोल गर्दै घरेलु टोलीलाई अग्रता दिलाए । दोस्रो हाफको पहिलो मिनेटमा नै फ्लाभिएन टेटले गोल गर्दै अग्रता दोब्बर पारे । उनले पहिलो गोल गरेका लाबोर्डको कटब्याकलाई गोलमा परिणत गरेका थिए ।
दोस्रो हाफको ७० औं मिनेटमा एमबाप्पेले गोल गरेपनि भीएआरले त्यसलाई मान्यता दिएन । थ्रु बलमा गोल गरेका उनलाई रिप्लेमा अफसाइड पोजिसनमा रहेको देखिएको थियो । त्यसअघि लिओनेल मेस्सीले पहिलो हाफमा प्रहार गरको फ्रिकिक क्रसबारमा लगेर बाहिरिएको थियो ।
पिएसजीले ६ महिनापछि लिगमा हार बेहोरेको हो । अप्रिलमा गत सिजनको च्याम्पियन लिलले हराएपछि पिएसजी अपराजित रहेको थियो । जारी सिजन लगातार ८ खेल जितेको पिएसजीले पहिलो पटक अंक गुमाएको हो ।
हारका बाबजुद पनि पिएसजी अंक तालिकामा ६ अंकले अघि छ । पिएसजीले ९ खेलमा २४ अंक जोडेको छ । दोस्रो स्थानको लेन्सले ९ खेलमा १८ अंक बनाएको छ ।
