एजेन्सी – यो सिजन उच्च लयमा रहेका फ्रान्सेली फरवार्ड करिम बेन्जेमा स्पेनिस क्लब रियल म्याड्रिडको टोलीबाट बाहिरिएका छन् । प्रशिक्षक कार्लाे एन्सेलोटीले स्पेनिस ला लिगामा इल्चेविरुद्धको खेलका लागि बेन्जेमालाई टोलीमा समेटेका छैनन् ।
रियलले आज (शनिबार) राति इल्चेको सामना गर्दैछ । खेल इल्चेको मैदानमा ५ः४५ बजे हुनेछ । बेन्जेमाले च्याम्पियन्स लिगमा सेरिफसँग पराजित भएको खेलमा चोट बोक्न पुगेका थिए । चोटका बावजुत पनि बेन्जेमाले रियलले खेलेको पछिल्लो सबै चार खेलसँगै फ्रान्सबाट विश्वकप छनोट खेलेका थिए । बेन्जेमा शुक्रबारको प्रशिक्षण क्याम्पमा सहभागी भएनन् ।
यो सिजन बेन्जेमा सबैभन्दा धेरै मिनेट खेल्ने रियलका तेस्रो खेलाडी हुन् । उनीभन्दा अघि थिवाउट कोर्टुवा र इडर मिलिसाओले बढी मिनेट खेलेका छन् । बेन्जेमाको अनुपस्थितिमा रियललाई अग्रपङ्तिमा समस्या पर्न सक्नेछ । तर, भिनिसियस जुनियर, रोड्रिगो, इडेन हाजार्ड, लुका जोभिक टोलीमा रहेका छन् । बेन्जेमाले यो सिजन ला लिगामा १० खेल खेल्दा ९ गोल र ७ असिस्ट दिएका छन् ।
इल्चेविरुद्ध रियलको टोली
गोलरक्षक – थिवाउट कोर्टुवा, एन्ड्री लुनिन र टोनी फुइडिएस
डिफेन्डर – ड्यानी कार्भाजल, फर्लान्ड मेन्डी, इडर मिलिसाओ, डेभिड अलावा, जेसस भालेजो, नाँचो फर्नान्डेस र मार्सेलो
मिडफिल्डर – टोनी क्रुस, क्यासमिरो, लुका मोड्रिच, इडुआर्ड कामाभिंगा, लुकास भास्क्वेज, एन्टेनियो ब्लान्को र इस्को
फरवार्ड – इडेन हाजार्ड, मार्काे एसेन्सियो, लुका जोभिक, रोड्रिगो, मारियानो डियाज र भिनिसियस जुनियर
