माउरिसियो पोचेटिनोले निराशाजनक नतिजाहरू र लियोनल मेस्सीको बारेमा अफवाहहरू पछि पेरिस सेन्ट-जर्मेनको हालको अवस्थाको बारेमा बोलेका छन्। पछिल्ला केहि खेलमा लगातारको खराब प्रदर्शन र ड्रेसिङ रुमको वातावरण पनि विभाजन भएको खबर आएसँगै अर्जेन्टिनी प्रशिक्षक अहिले निकै दबाबमा रहेका छन्।
लेन्स र नाइस विरुद्ध ब्याक-टु-ब्याक ड्रको बावजुद पीएसजी लिग १ को शीर्षमा ११ अंकको अग्रताका साथ रहेको छ, तर नकारात्मक प्रेस पोचेटिनोलाई हटाउन असम्भव भएको छ। धेरै जसो नकारात्मक खबर मेस्सीको नामबाट आएको छ। केहि रिपोर्टहरुका अनुसार मेस्सी पीएसजीलाई सफल र उत्कृष्ट सिजन तर्फ मार्गदर्शन दिने सहि प्रशिक्षक हुन् भन्नेमा विश्वस्त छैनन्।
मेस्सी, जियानलुइगी डोनारुम्मा, सर्जियो रामोस, आचराफ हाकिमी र जर्जिनियो विजनाल्डम जस्ता उत्कृष्ट खेलाडीको अनुबन्धपछि पोचेटिनोको पेरिसमा स्टार-स्टड्ड टोली छ। तर, मेस्सी, नेयमार र केलियन एमबाप्पेको साथमा सहि सन्तुलन खोज्नु पोचेटिनोका लागि च्याम्पियन्स लिगमा गाह्रो साबित भएको छ, जहाँ पीएसजीले यस सिजन आफ्ना पाँच खेलमध्ये दुई खेल मात्र जितेको छ।
यस्तो खराब प्रदर्शनका बीच एल’एकुइपे को एक रिपोर्टले जनाए अनुसार मेस्सी र उनका सहयोगीहरूलाई डर छ कि पोचेटिनोले ड्रेसिङ रुममा पूर्ण नियन्त्रण राख्न सक्दैनन् र धेरै वरिष्ठ खेलाडीहरूको सम्मान गुमाएका छन्। पीएसजीले मंगलबार च्याम्पियन्स लिग समूह चरणको आफ्नो अन्तिम खेलमा क्लब ब्रुगसँग खेल्दैछ। फ्रेन्च क्लबले समूह उपविजेताको रूपमा अघिल्लो चरणमा आफ्नो स्थान भने पक्का गरिसकेको छ।
“म राम्रो महसुस गर्दैछु, म शान्त छु,” पोचेटिनोले सोमबार खेल भन्दा पहिलेको पत्रकार सम्मेलनमा भने, म एउटा संस्थामा काम गर्दैछु जुन हामीले गरेका कामहरू बारे सचेत छ। म क्लबको समर्थन महसुस गर्दैछु। म शान्त छु किनकि मलाई थाहा छ कि हामीले सेट गरेको प्रक्रियाको बारेमा।”
उनले थपे, “मैदान भित्र भएका कुरा सबैले देखेका छन् र मैदान बाहिर देखा परेका चीजहरु सबै बनावटी हुन्। हामीलाई थाहा छ पीएसजी जस्तो क्लबमा अफवाहहरू हाम्रो जीवनको हिस्सा हुन्।”
