एजेन्सी – अर्जेन्टिनी डिएगो सिमिओनी डिसेम्वर २०११ मा स्पेनिस क्लब एट्लेटिको म्याड्रिडको मुख्य प्रशिक्षक बने । त्यसयता उनी निरन्तर एट्लेटिकोकै मुख्य प्रशिक्षक रहेका छन् ।
क्याटलान क्लब बार्सिलोना र स्पेनिस क्लब रियल म्याड्रिड क्लबको खराब प्रदर्शनसँगै प्रशिक्षकलाई बर्खास्त गर्न ढिला सुस्ती गर्दैनन् । यो १० वर्षको अवधिमा मात्र बार्सिलोनाले आठ प्रशिक्षक परिवर्तन गरिसकेको छ । रियलले पनि सोही औसतमा प्रशिक्षक फेर्दै आएको छ । तर, एटलेटिकोमा सिमिओनी निरन्तर छन् ।
बार्सिलोनाले पेप ग्वार्डिओलाको नेतृत्वमा फुटबल इतिहासमा सबैभन्दा अभुतपूर्व सफलताहरु हात पार्न सफल भएको थियो । त्यसपछि लुइस इनरिकेको प्रशिक्षणमा पनि बार्सिलोनाले राम्रै नतिजा आत्मसात गरेको थियो । त्यसयता भने क्लब दीर्घकालीन प्रशिक्षक भेट्न असफल रहेको छ ।
आइतबार ला लिगाको खेलमा बार्सिलोनाले घरेलु मैदानमा एट्लेटिको म्याड्रिडको आतिथ्यता गर्दैछ । जहाँ जाभी क्याम्प नोउमा एट्लेटिकोलाई हराउने लक्ष्यमा हुनेछन् । जाभी सिमिओनीको सामना गर्ने बार्सिलोनाको आठौं प्रशिक्षक बन्नेछन् ।
यो एक दशकमा बार्सिलोनाको उथलपुथलबारे सिमिओनीलाई राम्रो जानकारी रहेको छ । एट्लेटिको र बार्सिलोनाबीचको भिडन्त दुवै टोलीका लागि सिजनको बाँकी समयको लागि अझ सुधार गर्नुपर्ने पक्ष बुझ्ने एउटा महत्त्वपूर्ण खेल हो । ला लिगाको खलहरु अझै बाँकी रहेपनि यो खेलले शीर्ष चारको पनि छिनोफानो गर्न सक्नेछ ।
जाभीले लियोनेल मेस्सीको प्रस्थानसँगै उतारचढावले भरिपूर्ण टोलीलाई सम्हालेका छन् । बार्सिलोनाका पुर्व खेलाडीले क्याम्प नोउमा आवश्यक स्थिरता ल्याउने प्रयासमा एट्लेटिकोमा सिमिओनीले के गरेका छन् भनेर पक्कै पनि हेर्नेछन् ।
को हुन् बार्सिलोनाका आठौं प्रशिक्षक?
पेप ग्वार्डिओलाले सन् २०१२ मा क्लब छोडेपछि स्वर्गीय टिटो भिलानोभा सन् २०१२–१३ को लागि बार्सिलोनाको प्रशिक्षक बने । भिलानोभापछि टाटा मार्टिनो एक वर्ष बार्सिलोनाको प्रशिक्षक बने । त्यसपछि लुइस एनरिकले २०१४ देखि २०१७ सम्म बार्सिलोनाको प्रशिक्षण भार सम्हाले । उनले बार्सिलोनामा सुनौलो पल बिताए ।
त्यसपछि एर्नेस्टो भाल्भेर्डेले तीन वर्ष बार्सिलोनाको प्रशिक्षण सम्हालेपनि आशातित प्रदर्शन दोहोर्याउन सकेनन् । छोटो समयका लागि क्विके सेटिन आए । त्यसपछि रोनाल्ड कोम्यान बार्सिलोनाको मुख्य प्रशिक्षक बने ।
कोम्यानको बर्खास्तीपछि सेर्गी बर्जुआन बार्सिलोनाको अन्तरिम प्रशिक्षक बनेपनि बार्सिलोनाले लगत्तै आफ्ना पुर्व मिडफिल्डर जाभीलाई मुख्य प्रशिक्षकमा नियुक्त गरे । पछिल्लो १० वर्षमा बार्सिलोनाको जिम्मेवारी लिने उनी आठौं प्रशिक्षक हुन् ।
सिमिओनीविरुद्ध सबैभन्दा धेरै सफलता हात पार्नेमा लुइस एनरिके रहेका छन् । हाल स्पेनिस टोलीका प्रशिक्षक रहेका एनरिकेले आफ्नो तीन वर्षको अवधिमा एट्लेटिकोविरुद्ध खेल्दा ९ जित, २ बराबरी र १ खेलमा मात्रै हार बेहोरे । त्यो हार मध्ये एक सन् २०१५–१६ को च्याम्पियन्स लिगको क्वाटरफाइनलमा रहेको थियो । जतिबेला एट्लेटिकोले बार्सिलोनालाई दोस्रो लेगमा हराएको थियो ।
