एजेन्सी – बिहिबार राति प्रिमियर लिगमा आर्सनलले वुल्भ्सलाई उसकै मैदानमा पराजित गर्यो। निकै प्रतिष्पर्धात्मक बनेको खेलमा आर्सनल १-० को गोल अन्तरले विजयी भएको थियो। बलमा बढी वुल्भ्सको पकड रहेपनि आर्सनलले जित निकालेको थियो। आर्सनलका गाब्रियलले २५औं मिनेटमा गरेको गोल नै निर्णायक बन्यो।
वुल्भ्स विरुद्धको खेलमा जित निकालेसँगै आर्सनल शिर्ष चारको दौडमा पुनः फिर्ता भएको छ। सिजनका २२ खेल खेल्दा आर्सनलले ३९ अंक बनाएको छ। सो जित पश्चात आर्सनल अंक तालिकामा म्यानचेस्टर युनाइटेडलाई पछि पार्दै शिर्ष ५ मा उक्लियो। दुई खेल बढी खेलेको वेस्ट ह्याम आर्सनल भन्दा मात्रै एक अंकले अगाडी छ।
यसैबीच वुल्भ्सका मिडफिल्डर रुबेन नेभ्सले जित पछि आर्सनलले लिग नै जिते जसरी खुशियाली मनाएको टिप्पणी गरेका छन्। खेलपछि पत्रकारहरुसँग कुराकानी गर्नेक्रममा नेभ्सले यस्तो टिप्पणी गरेका हुन्।
“हामीले उनीहरूको खुशियाली मनाउने तरिका देख्यौं। त्यसले हाम्रो स्तर देखायो। उनीहरूले जितको यसरी खुशियाली मनाएको देखेको थिएनौं। उनीहरुले लिग नै जिते जसरी उत्सव मनाए।”,नेभ्सले भने।
आर्सनल विरुद्ध वुल्भ्सले धरै राम्रो खेलेपनि गोलको मामलामा चुकेको नेभ्सले बताए। गोलको मामलामा राम्रो गर्न सकेको भए खेलको नतिजा अर्कै हुन सक्थ्यो भन्ने नेभ्सको भनाई छ।
उनले भने,”हामीले राम्रो गर्यौं तर हामी गोल गर्न भने सकेनौं। यो पनि सत्य हो कि हामीले अलि बढी गोल पनि बेहोरिरहेका छौँ। हामीले गोलका अवसरहरु शिर्जना गरेपनि गोल गर्ने मामलामा चुकिरहेका छौँ, त्यसलाई सुधार गर्नुपर्ने छ।”
