एजेन्सी – क्रिस्टियानो रोनाल्डो जुनियर आफ्ना पिता क्रिस्टियानो रोनाल्डोको पाइला पछ्याउँदै छ। सानै उमेर देखि फुटबल खेल्न थालेका उनी अन्ततः म्यानचेस्टर युनाइटेडमा सामेल भएका छन्। रोनाल्डो जुनियर हालसालै युनाइटेडको एकेडेमीमा आधिकारिक रुपमा सामेल भएका हुन्। रोनाल्डो जुनियर ११ वर्षको उमेरमा युनाइटेडको एकेडेमीमा सामेल भएको विभिन्न खेल मिडियाहरु बताउँछन्।
सो खबरलाई रोनाल्डोकी प्रेमिका जर्जिना रोड्रिग्वेजले पनि पुष्टि गरेकी छन्। इन्स्टाग्राममा एक तस्विर राख्दै उनले रोनाल्डो जुनियर आधिकारिक रुपमा युनाइटेडको एकेडेमीमा सामेल भएको जानकारी दिएकी छन्।
जर्जिनाले पोस्ट गरेको तस्विरमा रोनाल्डो जुनियर सात नम्बरको जर्सी सहित देखिएका छन्। तस्विरमा उनका अलावा जर्जिना र रोनाल्डोका अन्य सन्तानहरु पनि देखिएका छन्।
“हाम्रा सपनाहरू सँगै पछ्याउँदै। आमाको तर्फबाट धेरै माया।”,तस्विर सार्वजनिक गर्दै जर्जिनाले लेखेकी छन्। बताइएअनुसार रोनाल्डो जुनियर र अर्का प्रतिभाशाली ग्याब्रियललाई पनि युनाइटेडले प्रस्तुत गरेको थियो।
केहि साता अगाडी मात्रै रोनाल्डोले पनि रोनाल्डो जुनियरसँगै फुटबल खेलिरहेको एक तस्विर सामाजिक संजालमा राखेका थिए। तस्विरमा रोनाल्डो जेठा छोरा रोनाल्डो जुनियरलाई फुटबल सिकाउँदै गरेको अवस्थामा देखिएका थिए। तस्विर सँगै उनले लेखेका थिए,”वर्तमान र भविष्य”
रोनाल्डो जुनियरलाई एक राम्रो फुटबलर बनाउने रोनाल्डोको चाहना छ। रोनाल्डोको चाहना अनुरुप नै जुनियर पनि फुटबलमा अगाडी बढिरहेका छन्। केहि समय अगाडी रोनाल्डोले एक अवार्ड कार्यक्रममा रोनाल्डो जुनियर महान फुटबलर बनेको देख्ने चाहना रहेको बताएका थिए।
