एजेन्सी – अतिरिक्त समयमा ब्राजिली क्लब पाल्मेइरसलाई पराजित गर्दै इंग्लिस क्लब चेल्सी फिफा क्लब विश्वकपको च्याम्पियन बनेको छ । चेल्सीले पाल्मेइरसलाई २–१ ले पराजित गर्दै पहिलोपटक क्लब विश्वकपको च्याम्पियन बन्न सफल भएको हो ।
साउदी अरेबियाको आवुधावीस्थित मोहम्मद विन जायद रंगशालामा शनिबार राति भएको खेलको निर्धारित समयको १–१ गोलको बराबरी भएपछि खेल अतिरिक्त समया लम्विएको थियो । अतिरिक्त समयमा काई हाभर्टजले पेनाल्टीमा गोल गर्दै चेल्सीलाई च्याम्पियन बनाए ।
चेल्सीका लागि रोमेलु लुकाकु र काई हाभर्टजले गोल गरे । पाल्मेइरसका राफयल भेइगाले एक गोल फर्काए । प्रतिस्पर्धात्मक बनेको खेलको पहिलो हाफ गोलरहित बराबरीमा सकिएको थियो । ५५औं मिनेटमा लुकाकुले गोल गर्दै चेल्सीलाई १–० को अग्रता दिलाए । उनले कलुम हड्सन ओडोईको क्रसमा हेडमार्फत गोल गर्न सफल भएका थिए ।
तर, चेल्सीको अग्रता लामो समय टिकेन । ६४औं मिनेटमा राफयल भेइगाले पेनाल्टीमा गोल गर्दै खेललाई १–१ गोलको बराबरीमा ल्याए । मार्काेस रोचाको थ्रु बललाई पेनाल्टी बक्सबाट हेडमार्फत क्लियर गर्ने क्रममा थियागो सिल्भाको ह्यान्ड हुन पुगेपछि रेफ्रीले भिएआरको सहायता लिदै पाल्मेइरसलाई पेनाल्टी प्रदान गरेको थियो । जसमा भेइगा चुकेनन् । त्यसपछि थप गोल हुन नसक्दा खेल अतिरिक्त समयमा लम्विएको थियो ।
११७औं मिनेटमा काईले पेनाल्टीमा गोल गर्दै चेल्सीलाई च्याम्पियन बनाए । पेनाल्टी बक्समा कप्तान सिजर एज्पिलिक्वेटाको प्रहारलाई लुआन गार्सियाको हातमा लागेको भन्दै चेल्सीले अपिल गरेपनि रेफ्रीले सुरुवातमा कुनै प्रतिक्रिया पछि भिएआरको सहायता लिदै चेल्सीलाई पेनाल्टी प्रदान गरेको थियो ।
अतिरिक्त समयको थप गरिएको छैटौ मिनेटमा लुआन गार्सिया दोहोरो पहेलो कार्ड खाँदै मैदानबाट बाहिरिरिएपछि पाल्मेइरस १० खेलाडीमा समेटिएर खेलको अन्त्य गरेको थियो ।
यो सिजनमा चेल्सीको यो दोस्रो उपाधि हो । यसअघि चेल्सीले गत अगस्टमा स्पेनिस क्लब भिल्ला रियललाई हराउँदै युइएफए सुपर कपको च्याम्पियन बनेको थियो ।
