एजेन्सी – यूइएफइ च्याम्पियन्स लिग यो हप्ता देखि फर्किँदैछ। समूह चरणका सकिएपछि अन्तिम १६का खेलहरु सहित च्याम्पियन्स लिगका खेलहरु फिर्ता हुन लागेका हुन्। यस साता देखि च्याम्पियन्स लिगका खेलहरु सुचारु हुनेछन्।
समूचरणका खेलमा समूह विजेता र समूह उपविजेता क्लबहरु बीचको ड्र यस अगाडी नै सम्पन्न भइसकेको छ। सोहि आधारमा अब क्लबहरुले दुई लेगमा प्रतिष्पर्धा गर्नेछन्। अन्तिम १६ का खेलहरु शुरु हुनु भन्दा अगाडी अहिले हामी अन्तिम १६ मा सबै भन्दा राम्रो प्रदर्शन गर्न सफल खेलाडीहरु बारे चर्चा गर्दैछौँ।
करिम बेन्जेमा
करिम बेन्जेमा निरन्तर राम्रो प्रदर्शन गर्ने स्ट्राइकरमा पर्छन्। क्रिस्टियानो रोनाल्डोले रियल म्याड्रिड छाडेपछि त उनले झनै राम्रो प्रदर्शन गर्दै आएका छन्। च्याम्पियन्स लिगमा कहिले पनि शिर्ष गोलकर्ता अवार्ड नजितेपनि सन् २०११-१२ मा उनले सर्वाधिक असिस्ट दिएका थिए। रियलसँग रहेका उनले अहिले सम्म चार पटक च्याम्पियन्स लिग जितिसकेका छन्। राउण्ड अफ १६ को कुरा गर्नुपर्दा बेन्जेमाले अहिले सम्म ११ गोल गरेका छन्। अन्तिम १६ मा बेन्जेमाले पहिलो पटक सन् २००७-८ को सिजनमा गरेका थिए।
थोमस मुलर
जर्मन क्लब बायर्न म्युनिखका थोमस मुलर असिस्ट दिने मात्र होइन गोल गर्न समेत सक्ने खेलाडी हुन्। उनी च्याम्पियन्स लिगमा ५० गोल पूरा गर्ने ८ खेलाडी मध्येमा पर्छन्। मुलरले बायर्नमा रहेर दुई पटक च्याम्पियन्स लिग जितिसकेका छन्। उनले अन्तिम १६ मा १२ गोल गरेका छन्।
रोबर्ट लेवान्डोस्की
रोबर्ट लेवान्डोस्कीले आफ्नो करियरमा एक पटक मात्रै च्याम्पियन्स लिग जितेका छन्। सन् २०१९-२०को संस्करण बायर्न म्युनिखले जित्दा उनी टोलीको प्रमुख खेलाडी थिए। लेवान्डोस्की च्याम्पियन्स लिगमा सर्वाधिक गोल गर्ने तेस्रो खेलाडी रहेका छन्। उनले च्याम्पियन्स लिगमा ८२ गोल गरिसकेका छन्। ती मध्ये १४ गोल उनले राउण्ड अफ १६ मा गरेका थिए।
क्रिस्टियानो रोनाल्डो
क्रिस्टियानो रोनाल्डो च्याम्पियन्स लिगका सर्वाधिक गोलकर्ता रहेका छन्। रोनाल्डोले अहिले सम्म च्याम्पियन्स लिगमा १ सय ४० गोल गरिसकेका छन्। राउण्ड अफ १६ मा मात्रै रोनाल्डोले २५ गोल गरेका छन्। रोनाल्डोले म्यानचेस्टर युनाइटेड, रियल म्याड्रिड र युभेन्टस तीनै क्लबका लागि अन्तिम १६का प्रतियोगिताहरुमा गोल गरेका छन्।
लियोनेल मेस्सी
च्याम्पियन्स लिगमा क्रिस्टियानो रोनाल्डोपछि यदि कसैले बढी गोल गरेको छ भने ती लियोनेल मेस्सी हुन्। मेस्सीले च्याम्पियन्स लिगमा १ सय २५ गोल गरेका छन्। ती मध्ये २९ गोल मेस्सीले अन्तिम १६ मा गरेका थिए। करियरमै पहिलो पटक मेस्सी बार्सिलोना बाहिरबाट च्याम्पियन्स लिगमा सहभागी भइरहेका छन्। मेस्सीले पिएसजीबाट खेल्दै समूह चरणका खेलमा ५ गोल गरेका थिए।
