एजेन्सी – पोर्चुगिज स्टार क्रिस्टियानो रोनाल्डोले म्यानचेस्टर युनाइटेडको कप्तान बन्ने चाहना राखेका छन्। बेलायतबाट प्रकाशित हुने विभिन्न मिडियाहरुका अनुसार रोनाल्डोले युनाइटेडको कप्तानको जिम्मेवारी लिने चाहना राखेका हुन्।
यस विषयमा रोनाल्डोले युनाइटेडका प्रशिक्षक राल्फ राङनिकसँग छलफल समेत गरिसकेको बताइन्छ। ह्यारी म्यागुइरको लगातार कम्जोर प्रदर्शन पछि उनको ठाउँमा रोनाल्डो कप्तान बन्न चाहेको धेरैको दावी छ।
कप्तान त्याग्ने विषयमा म्यागुइरको समेत राङनिकसँग छलफल गरेको डेली मिररले जनाएको छ। सो मिडियाका अनुसार युनाइटेडका अन्य धेरै खेलाडीहरु पनि म्यागुइरलाई कप्तानबाट हटाएर रोनाल्डोलाई कप्तानको जिम्मेवारी दिइयोस् भन्ने चाहन्छन्।
यसै सिजन युभेन्टसबाट युनाइटेड पुगेका रोनाल्डोको प्रभाव दिनप्रतिदिन बढीरहेको छ। रोनाल्डोको प्रभाव युनाइटेडको स्क्वाडमा मात्र नभई युनाइटेडको व्यवस्थापनमा समेत रहेको छ। यस्तोमा धेरै खेलाडीहरुले सिजनका बाँकी समय रोनाल्डोलाई कप्तानको रुपमा हेर्न चाहेका छन्।
तर युनाइटेडमा केहि यस्ता खेलाडीहरुको पनि समूह छन्, जो रोनाल्डोलाई कप्तानको रुपमा देख्न चाहँदैनन्। यस विषयमा युनाइटेड दुई समूहमा विभाजित भएको छ।
राङनिकको चाहना
राङनिक व्यक्तिगत रुपमा रोनाल्डोलाई तत्काल कप्तानको जिम्मेवारी दिइनुपर्छ भन्ने पक्षमा छैनन्। सिजनमा बाँकी समय म्यागुइर नै कप्तान रहुन् भन्ने उनको चाहना छ। म्यागुइरले आफ्नो प्रदर्शन सुधार्न तर्फ केन्द्रित हुनुपर्ने राङनिकको बुझाई रहेको छ।
